Нэгэн үе “Show Bizz”-ээрээ Монголын нэвтрүүлгийн жанарт тэсрэлт болон гарч ирсэн жүжигчин Г.Анхбаярыг мэдэхгүй, танихгүй хүн гэвэл ховор биз ээ. Тэгвэл “Гурван найз яасан байх нь уу” кино нээлт дээр түүнтэй хэсэгхэн хором ярилцлаа.
- Олон ангит Гурван найз киног яагаад заавал нэг ангит болгож хийх болсон бэ?
- Кинонд үргэлжлүүлэх буюу дахин хийгдэх гэж төсөл байдаг. “Гурван найз”-ын хувьд дөчин анги хүрээд, хүмүүсийн дунд хүлээлт үүсгэсэн учраас үргэлжлэл нь хийгдэж байна гэсэн үг байхгүй юу.
- Цаашид энэ сериалаа үргэлжлүүье гэсэн бодол бий юу?
- Тэрийг үнэхээр сайн мэдэхгүй байна. Тэгэхдээ хийгдвэл зөндөө л анги байгаа л даа. Гэхдээ тэр дотроос арай өөр төрлөөр хийгдэх байх аа. Одоо бол үүгээрээ удаан оршин тогтноход хэцүү л байх.
- “Гурван найз яасан байх нь уу” УСК-аар юуг өгүүлж, юуг харуулахыг хүссэн бэ?
- Найз нөхөрлөлийн үнэ цэнийг л харуулъя гэсэн. Гол хэлэх санаа нь хүний амьдралд янз бүрийн асуудал гарч ирж болно, мөнгө гарч ирж болно, хайр сэтгэл - байж болно. Гэхдээ нөхөрлөл гэдэг зүйлийг аль ч зохиол дээр хаяхгүйгээр чиний амьдралын том хөшүүрэг, том эргэлт юм шүү гэдэг дээр л авч үлдэхийг хичээсэн.
- Цахим хуудаснаа та “Миний амьдралын хамгийн сайхан мөч эмээтэйгээ өнгөрүүлсэн хором мөч бүхэн” гэсэн байсан?
- Миний бурхан гэх юм уу. Энэ хорвоо дээр миний хамгийн их хайрлаж явдаг хүн бол миний эмээ. Бурхан болчихсон ч гэсэн үргэлж миний сэтгэл зүрхэнд байж байдаг. Намайг өдий зэрэгтээ явахад хамгийн том нөлөө үзүүлсэн, миний үлгэр дуурайлал, миний бүх зүйл миний эмээ.
- Таныг эмээ тань урлагийн замд хөтөлсөн гэсэн үг үү?
- Тийм, миний өвөө МУГЖ Б.Содном. Олон дунд “алиа Содном” нэрээрээ алдаршсан тэр хүний гэргий бол миний эмээ. Тэгээд л намайг өөрийхөө нөхөр шиг болгох гэж их хичээж байсан байх. Тийм ч урчаас хүсэл мөрөөдөлдөө хүрч байгаад эмээгийнхээ ачийг яваандаа хариулна гэж бодож явдаг.
- Тэр хүсэл мөрөөдлөөсөө хуваалцаж болох уу?
- Одоохондоо нууц хэвээрээ байг. Бүтэхээ больчихож магадгүй.
- Наполеоныг өглөө болгон эмээ нь “Францын агуу удирдагч минь сэрээрэй” гэж дууддаг байсан гэдэг. Тэгвэл, танд эмээгийн чинь өхөөрдөж дууддаг байсан нэр бий юу?
- Тэр бол бид хоёрын нууц. Гэхдээ би яг тэр үгэнд итгэж явдаг. Анх тэр үгийг сонсоод надтай адилхан юм байна даа гэж шууд бодсон. Яах вэ, эмээ минь намайг сэрээдэг байсан тэр үгийг бол хүн болгонд яриад хэрэггүй байх. Гэхдээ эмээ дээрээ өссөн хүүхдүүд ч юм уу, эмээ өвөө дээрээ өссөн хүүхдүүд мэдэж байгаа байх. Энэ маш чухал зүйл. Гэхдээ тэр нэрээ хүсэл мөрөөдөлдөө хүрч, эмээгийнхээ ачийг хариулсан үедээ хэлье.
Ярилцсанд баярлалаа.
Б.Хишигдэлгэр
