Дэлхийн хамгийн алдартай шоуны нэг Got talent шоу Азид зохион байгуулагдаж байгаа бөгөөд Asia's got talent шоу нь энэ оны 3 дугаар сарын 12-ноос AXN телевизээр Азийн 20 гаруй улс оронд зэрэг цацагдаж эхэлсэн билээ. Тус шоунд Азийн улс орнуудаас мянга мянга оролцогчид ирж оролцсоноос "Хөсөгтөн" хамтлаг сая сая үзэгчид болоод эрхэм шүүгчдэд Монгол ардын урлагийн гайхамшгийг мэдрүүлж тэднийг бишрүүлээд авсан бөгөөд шүүгчдээс санал нэгтэйгээр "Тийм" гэсэн үнэлгээг авч хагас шигшээд шалгаран үлдсэн билээ.
Тэгвэл “Хөсөгтөн” хамтлаг шилдэг 9-д буюу финалд шалгарч үлдсэн сайхан мэдээ байна. Тус шоу нэвтрүүлэгт Монгол Улсаас анх удаа “Хөсөгтөн”оролцож /IV.30/ пүрэв гарагийн орой “Asia’s Got Talent” шоу нэвтрүүлгийн шилдэг 9-ийг шалгаруулах санал асуулгын дүн гарна хэмээж байсан Монгол хүн бүхэн сэтгэл догдлон хүлээж байсан.
Ийнхүү язгуур урлагаа дэлхийд сурталчилж, Монгол хэмээх нэрийг гаргаж яваа манай залуус Азийн орнуудыг байлдан дагуулж, шилдэг 9-ийн нэгээр шалгарч чадлаа. Дашрамд дуулгахад тэмцээний ялагч $100.000 ам.долларын эзэн болохоос гадна Сингапурын “The Marina Bay Sands” зочид буудалд тоглолтоо хийх эрхийг авах юм.
