Азийн волейболын холбооны ивээл дор болж буй тивийн зүүн бүсийн эрэгтэйчүүдийн аварга шалгаруулах тэмцээн Улаанбаатар хотноо Буянт-Ухаа спортын ордонд үргэлжилсээр байна. Азийн зүүн бүсэд найман үндэсний холбоод харьяалагддаг бөгөөд энэ жилийн тэмцээнд анх удаагаа бүрэн бүрэлдэхүүнээрээ оролцож байна. Тодруулбал “А” хэсэгт Монгол, БНХАУ, БНСУ, ХонгКонг, “В” хэсэгт Япон, Макао, Тайвань, БНАСАУ-ын багууд багтсан юм.
Манай улсын баг тамирчид анхны тоглолтоо Хонгконгийн багтай тоглож, 3:0-ээр хожсон. Тэгвэл өчигдрийн тоглолт мөн л Монголчуудын ялалтаар өндөрлөлөө.
Монголын баг БНХАУ-ын шигшээ багтай тоглож, 3:0-ээр хожсон байна. Өнөөдөр манай волейболчид БНСУ-ын багтай 20.00 цагт тоглоно. Энэ тоглолтод хожвол Монголын баг хэсгээсээ шалгарч, медалийн төлөө тоглох эрхтэй болно.
Эх сурвалж: Шуурхай.мн
