S.Outlet's-д өгөх Мэргэжлийн байгууллагуудын хариу

Дэлхийн брэндээр монголчуудаа гоёж байгаагаа гайхуулж, өдөр болгон шахуу задгай талбайн зад хямдрал хэмээн утсаар уриалан дууддаг "S.Outlets" бэлэн хувцасны дэлгүүрийнхэн урсгал нь татраад олон жилийн нүүрийг үдэж буй Сэлбэ голын улаан голыг таслахаар шийдэв бололтой. Тодруулбал, тэд Сэлбэ голын эргийг ашиглаж Сэлбийн эргийг түрээд зогсохгүй, гол дээр нь шороо асгаж, хэд, хэдэн барилгын ажилд ханцуй шамлан орж, хууль дүрмийг уландаа гишгээд чамгүй удлаа.

Сэлбэ гол цагтаа эргээ халин урсдаг байсан тухай дурсан санааширдаг нийслэлчүүд урсацыг нь сайжруулах төслийн тухай ч бас хожим түүх болгон ярих л үлдэв бололтой. Өөрөөр хэлбэл, Ерөнхий сайд асан С.Батболдын санаачилгаар "Сэлбэ голын урсацыг нэмэгдүүлэх, орчныг тохижуулах" төслийн хүрээнд өнгө төрхийг нь өөрчлөхийн сацуу голоо аврахаар бүтээн байгуулалтын ажлыг одоогоос дөрвөн жилийн өмнө өрнүүлсэн билээ.

Тухайн үед Сэлбэ голын эрэг дээгүүр өдөржин, шөнөжин машин холхилдож, ажлын хувцсаар жигдэрсэн хүмүүс бужигналдан, тун сүрхий бүтээн байгуулалт өрнүүлсэн. Гэвч тэд 350 метр газрыг чүй ай тохижуулаад, хаашаа ч юм, арилаад өгсөн юм. Тэд үүнийгээ 8.9 тэрбум төгрөг шаардлагатай төсөлд нийслэл болон дүүргийн төсвөөс 2 тэрбум төгрөг гаргаж өгсөн гэсэн шалтгаанаар цэвэрхэн тайлбарлачихсан гэж байгаа. Ийнхүү хоёр тэрбум төгрөгөөр "наргисан" уг төслийг зогсоомогц хувийн хэвшлийнхэн ч урай хашхираад л, дураараа дургиж эхлэв.

Иймд бид S.Outlet's дэлгүүрийнхэн ямар учраас, хэний зөвшөөрлөөр Сэлбэ гол дотор шороо асгаж, хашаагаа өргөсгөөд зогсохгүй, Усны тухай хууль болон хэд, хэдэн хуулийг санаатайгаар зөрчиж, дур зоргоороо аашилж байгааг тодруулахаар сурвалжилсан юм.

Г.Мөнхтуул: "Иргэн аж ахуй нэгжүүд өөрсдөө хөдөлмөрийн аюулгүй байдлыг хангахгүй байна"

/НЕТГ-ын Хэвлэл мэдээлэл хариуцсан мэргэжилтэн /

- Тус үйлчилгээний барилга нь НЕТГ-ын 2014 оны нэгдүгээр сарын 02-ны өдрийн 980 дугаар архитектур төлөвлөлтийн даалгавараар  Д.Батзориг гэдэг иргэний нэр дээр гарсан. Энэ үйлчилгээний барилгад хоёр барилга орж байгаа. Нэг нь түр барилга, хэмжээ нь 16*30 метр, яг барилга нь 42*18 метрийн хэмжээтэй, доороо зоорийн давхартай, төмөр бетонон карказан 1-16 давхар үйлчилгээний барилга гэж зөвшөөрөл авсан.

Уг ажил нь Улаанбаатар хотын 2020 оны Ерөнхий төлөвлөгөө, Сэлбэ голын Ерөнхий төлөвлөгөөтэй уялдуулж тохижилт, зам талбай, гэрэлтүүлгээ төлөвлөнө гэж зөвшөөрлөө авсан.

- Гэтэл олгосон зөвшөөрлийг урвуулан ашиглаж, Сэлбэ гол дотор шороо асгаж, хашаагаа өргөсгөөд, Усны тухай болон хэд, хэдэн хуулийг зөрчиж байна энэ талаар?

- Манай хяналтын албанаас шаардлага тавьж болно. Гэвч Мэргэжлийн хяналтын газрын Байгаль орчны улсын байцаагчид л торгууль тавьж, хууль зөрчсөн үйл ажиллагааг зогсоох эрх үүрэг нь байдаг. Төрийн байгууллагынхаа хувьд бидэнд хууль дүрэм зөрчөөд байгаа үйл ажиллагаанд шаардлага тавих л эрх бий, төлөвлөлт зөрчсөн гэдэг үндэслэлээр. 
Хэрвээ мэдэгдэл шаардлагыг хүлээж авахгүй байвал санкц буюу арга хэмжээ авах эрх бүхий хүн нь улсын байцаагч. НЕТГ-аас ийм зөвшөөрлийг олгосон. Энэ бол ногоон байгууламж байх ёстой юм байна. Гэтэл барилгынхаа ажлыг хийхдээ голынхоо гольдрол руу оруулаад үйл ажиллагаа хийж байгаа юм байна. Үүнийг таслан зогсоох бүх эрх нь Мэргэжлийн хяналтын байцаагчид бий.

Я.Болдбаатар: "Шууд хууль зөрчөөд үйл ажиллагаагаа явуулж байгаа"

/Туул голын сав газрын захиргааны ахлах мэргэжилтэн/

- S.Outlet's-ийнхан дэлгүүрийн өргөтгөл нэрээр Сэлбэ голын эргийг хашсан байсан даланг нурааж, шороо асгаад голын гольдролыг өөрчиж нэлээд цаашлуулж далан босгосон байсан боловч холбогдох албаны хүмүүсээс ямар ч зөвшөөрөл авалгүй дур мэдэн хууль зөрчсөн. Мөн Байгаль орчны нарийвчилсан тайлан хийлгүүлээгүй, зөвшөөрөл аваагүй шууд хууль зөрчөөд үйл ажиллагаагаа явуулж байгаа нь илэрсэн. Угтаа голын гольдрол руу шороо асгах, түүнийг өөрчлөх тохиолдолд зөвхөн БОНХАЖЯ-ны сайд өөрөө гарын үсэг зурж байж зөвшөөрөл олгогддог хуультай.

Иймд бид газар дээр нь фото зургаар баримтжуулж, Барилгын талбай хариуцсан инеженер Д.Эрдэнэбатад зөвшөөрлөө авчирч өг гэдэг үүрэг даалгавар өгсөн. Хэд, хэдэн удаа шаардлага хүргүүлсэн ч, авчирч өгөлгүй сүүлдээ утсаа ч авахгүй алга болсон.

Мэдээллээ буруу өгдөг, хууль дүрмийг хүндэтгэн үздэггүй, хариуцсан төрийн байгууллагуудаас зөвшөөрөл авдаггүй ийм байдлуудтай хатуу хариуцлага тооцно. Энэ S.Outlet's дээр цаашид байнга хяналт шаардлага тавиад буулгуулах хүртэлх арга хэмжээг НЕТГ, НМХГ-тай хамтарч авах болно.

Б.Сайнбаяр: "Сэлбэ гол дотор дур мэдэж шороо асган, далан босгосон"

/НМХГ-ын Байгаль орчны хяналтын улсын байцаагч/

- S.Outlet's буюу "С.Сайн" ХХК сэлбэ гол дотор дур мэдэн шороо асгаж, далан босгосон. Тухайн компанийг зөвшөөрлийн бичиг баримтаа авч ирж үзүүлэхийг үүрэг болгосон боловч тэд одоогоор бидэнд юу ч авч ирж үзүүлээгүй байна. Тэгэхээр тэдэнд холбогдох байгууллагуудаас авсан ямар ч зөвшөөрөл байхгүй гэдэг нь тодорхой.

Ер нь үерийн хамгаалалтын далан босгохын тулд усны барилга,байгууламж гэдгээрээ заавал холбогдох байгууллагаас зөвшөөрөл авах ёстой байдаг. Гэтэл бичиг баримт дутуу, гэрчилгээгээ сунгуулах гээд өгчихсөн гэх нэрийдлээр зөвхөн менежер нь л ирж уулзсан.

Иймд барьсан далангаа буулга гэдэг албан шаардлагыг хүргүүлэх гэж байна. Хэрэв албан шаардлага биелүүлээгүй тохиолдолд "Усны тухай" хуулиар хөдөлмөрийн хөлсний доод хэмжээг 20-50 дахин нэмэгдүүлсэнтэй тэнцэх хэмжээний мөнгөн дүнгээр тухайн байгууллагыг торгох болно.

Д.Эрдэнэбат: "Н.Нацагдорж энэ газар дээр барилга барь гээд өгсөн"

/S.Outlet's дэлгүүрийн барилгын талбай хариуцсан инженер/

- Өнгөрсөн онд Улаанбаатар хотын ерөнхий архитектор Н.Нацагдоржоор баталгаажуулаад, схем зургийг нь хийлгүүлсэн. Тэр хүн "Энэ газар дээр барилга байгууламж барь аа"  гээд өгсөн шүү дээ. Манай хүн /S.Outlet's дэлгүүрийн менежер н.Нямдорж/ НМХГ, “Туул голын сав газрын захиргаа” гээд төрийн байгууллагуудтай уулзаад явж байгаа. Бид үнэндээ иргэнийхээ үүргийг биелүүлээд л "Иргэн хүн өмч хөрөнгөө хамгаалах ёстой" гэсэн хуулиа дагаад л, өдий, төдий хөрөнгө өөрсдөөсөө гаргаад явж байна.

Түрүүнд чиний асуугаад байсан 100 метрээс цаашаа, маашаа гээд, үнэндээ Улаанбаатар хотод энэ дүрэм зөрчигдчихлөө. Хаа сайгүй ийм байна. Та нар намайг голын сав руу оруулж барилга байгууламж барьлаа гээд л байна. Хийгээд өгсөн бичиг баримт, зөвшөөрлийнх нь дагуу ажлаа явуулж байна шүү дээ. Ул нь барилгын норм дүрмээр байдаг юм. Гэхдээ энэ хууль өнөөдөр бодит байдал дээр хэрэгжихгүй байгаа.

Э.Бат-Үүл: "Хариуцлагыг нь хүлээлгэж, анх байсан байдалд нь оруулна"

/Нийслэлийн засаг дарга бөгөөд Улаанбаатар хотын захирагч/

- Гомдол байгаа талаар өөрөөс чинь л анх удаа сонсч байна. Яагаад энэ талын асуудал надад хүрээгүй байгаа юм бол гэж гайхаад байна л даа. Тийм учраас наад талаар тодруулж байж хариулахгүй бол одоо хариулж мэдэхгүй байна. НЕТГ-аас асуугаад тодруулъя.

Хэрвээ хууль дүрэм зөрчсөн байвал хариуцлагыг нь хүлээлгэж, хийсэн ажлыг нь буцааж, анх байсан байдалд нь оруулахаар үйл ажиллагаа явуулна.

Албаны хүмүүсийн өгсөн дээрх тодруулгаас харахад S.Outlet's дэлгүүрийнхэн хэдэн тэрбумаар нь төсөвлөж урсацыг нь сайжруулах ажил хийсэн Сэлбэ гол дотор шороо асгаж, гольдрол өөрчлөөд зогсохгүй, албаны хүмүүсийн өгсөн үүрэг даалгаврыг биелүүлэхгүй, нэг рүү нь бухаж, булзааруулах үйлдэл гаргаж байгаа нь эргээд иргэдийг төрд итгэх итгэлгүй болоход нөлөөлж байгаа юм. Ирэх долоо хоногийн сүүлээр хэт даврагсдад барих эцсийн шийд гарах учир энэ талаар бид эргүүлэн мэдээллэх болно.

Б.Хишигдэлгэр