-Дэлхийн хошой аварга болоод эх орондоо ирлээ. Анхдагч байж чадлаа. Өнөөдөр холбооныхон нь хүлээн авч байна. Та сэтгэгдлээсээ хуваалцахгүй юу?
За, маш их баярлалаа. Сэтгэгдэл их өндөр байна. Холбооныхондоо баярлалаа.
-Өнгөрсөн тэмцээнийхээ талаар ярьвал?
-Өөртөө их итгэлтэй байсан. Оноогоор цэвэр ялах эсвэл цэвэр дарна гэсэн бодолтой, тактиктай дэвжээнд гарсан. Тэгээд өөрийнхөө санасан хэмжээнд хүртэл сайхан барилдаж хошой аварга болсондоо баяртай байна.
-Японы эмэгтэй тамирчид их хүчирхэг шүү дээ. Аваргын төлөө барилдсан тамирчин хэр хүчтэй байв?
-Өмнө нь барилдаж байгаагүй. Гэхдээ япончуудтай олон барилдаж байсан. Өөртөө итгэлтэй байсан.
-Мэдээж энэ сайхан амжилт гаргахад багийн хамт олон болон багш нарын хүч хөдөлмөр нэлээдгүй шингэсэн байх?
-Тэгэлгүй яах вэ. Шигшээ багийн багш дасгалжуулагчиддаа бүгдэнд нь баярлалаа гэж хэлмээр байна. Хил хамгаалах газар болон бэлтгэл хангагч, анхны багш болох Д.Дондов багшдаа баярлалаа. Энэ олон хүмүүсийн тусламж дэмжлэгээр би энэ амжилтад хүрлээ. Монголын ард түмэн маань үргэлж надад найдаж, тусалж дэмжиж байдаг. Тиймээс ард түмэндээ баярлалаа. Цаашдаа улам хичээх болно оо. 
ДАШТ-ий мөнгөн медальт Б.Номин: Олимпоос алтан медаль авахын төлөө бие сэтгэлээ зориулна
Юуны өмнө өөрт тань баяр хүргэе. Гайхалтай сайхан амжилт гаргалаа?
-Баярлалаа. Нэгдүгээр тойргоос эхлээд аваргын төлөө барилдсан барилдаан хүртэлх зам маань их дардам сайхан байлаа. Харамсалтай нь аваргын төлөө бага зэрэг тактикын алдаа гаргаад хожигдчихлоо. Гэхдээ цаашдаа гаргасан алдаа дээрээ суралцаад хичээж барилдах болно. Манай чөлөөт бөхийн түүхэнд олимпын алтан медаль байдаггүй. Тиймээс тун удахгүй болох олимпын наадмаас аваргын алтан медаль хүртэхийн төлөө бие сэтгэлээ зориулж, улам их хичээх болно.
-Аваргын төлөө барилдаан жоохон тиймхэн болсон. Уг нь тус гайхалтай барилдаж финалдсан шүү дээ?
-Аваргын төлөө барилдахдаа төдийлөн барилдаан гаргаж чадсангүй. Дэвжээн дээр гараад өөрийн сэтгэлд хүртэл сайхан барилдаагүй. Өөртөө бага зэрэг сэтгэл дундуур байгаа.
Багш дасгалжуулагчдаа хандаж юу хэлэх вэ?
-Надад эрдэм мэдлэгээ зааж сургаж байсан бүх багш нартаа баярлалаа. Та бүхнийхээ итгэлийг алдахгүй хичээж улам илүү амжилтад хүрнэ.
-Том зорилго өвөртөлж яваагаа хэллээ. Ард түмэндээ хандаж юу гэж хэлмээр байна вэ?
-Сая Лас Вегаст болсон дэлхийн аваргын үеэр тэнд байгаа монголчууд маань яг нутгийнхаа дэвжээн дээр байгаа юм шиг сэтгэгдэл төртөл дэмжиж байсан. Тэр нь маш их урам өгсөн. Ер нь бүх монголчууд маань биднийг үргэлж дэмжиж байдаг. Тиймээс та бүхнийхээ итгэлийг алдахгүйг хичээж бэлтгэл сургуулилалтаа улам сайн хийх болно.
-Дэлхийн аваргад олимпын бус жинд медаль хүртсэн. Олимпод ямар жинд орох вэ?
-Ирэх олимпод дээд жиндээ орж барилдах бодолтой байгаа. Дараа долоо хоногоос бэлтгэл сургуулилалтаа эхлүүлж олимпдоо бэлдэнэ.

Г.Бат