Эдийн засгийн байнгын хорооны хуралдаанаар 9 бүлэг 53 зүйл бүхий барилгын тухай хуулийн шинэчилсэн найруулгын төслийг хэлэлцэх эсэхийг шийдсэн. Үүнтэй холбогдуулан Барилга хот байгуулалтын сайд З.Баянсэлэнгэтэй цөөн хором ярилцсан юм.  

Би шагналаа хүртсэн гэсэн ярилцлага өгснийг тань уншсан юм байна. Та сайдын суудлыг хэлсэн үү, яагаад тэгж зоригтой ярьсан юм бэ? 

- Би тэр ярилцлагыг харсан. Энэ дашрамд би албан ёсоор хэлье. Би тийм муухай агуулгатай аймар үг хэллэгтэй ёс зүйгүй ярилцлага өгөөгүй. Надтай зөвхөн салбарын тухай л ярилцсан. Миний хэрэглээний  үгийн санд “бацаан, новш, хулгайч,товарищ” гэсэн үг байхгүй. Би тэр ярилцлагыг хараад үнэхээр гайхсан. Зориуд миний үг хэллэгийг мушгин гуйвуулж эвгүй хурц хэллэгтэй, муухай өнгө аястай ярилцлага болгон гаргасан байна билээ. Тэр сэтгүүлч өөрийнхөө үзэл бодол, сэтгэл хөдлөлөө нэмж шингээгээд биччихсэн юм болов уу даа. Би аль болох алдаа гаргахгүйг хичээж ажиллаж байгаа. Ийм байхад хүнийг ингэж муухай харагдуулж болохгүй шүү дээ. Залруулах хэрэгтэй. Бусад гишүүн шиг ярилцлагаа нийтлэхээс  нь өмнө харж хянаагүй нь миний алдаа болсон байх л даа. 

Та сайдын ажил аваад сар гаруй болж байна. Нэлээд ажил амжуулж байгаа бололтой. Барилга, хот байгуулалтын анхны эмэгтэй сайд юм билээ. Эмэгтэй хүнд бол хүндхэн салбар биз? 

-Ер нь эрэгтэйчүүдийн салбар гэж ярьцгаадаг л даа. Гэхдээ дийлэнх ажилтнууд нь эмэгтэйчүүд юм билээ.  Ачаа үүрч алдаа гаргахгүйг хичээж өөрийгөө их шахаж ажиллаж байгаа даа.

Байнгын хороогоор Барилгын хуулийн шинэчилсэн найруулгыг хэлэлцэхээр шийдвэрлэлээ. Шинэ хуульд тусгагдсан гол гол заалтуудаас дурьдахгүй юу?

-Барилгын хуулийн шинэчилсэн найруулгыг хэлэлцэхээр болж байгаа нь сайшаалтай хэрэг. Ер нь хуулийн төслийг эрчим хүч, автозам зэрэг холбогдох бүхий л салбартай нягт уялдаатай боловсруулсан. Барилгын ажилтнуудыг амь насны даатгалд хамруулах, барилгын компани ажилтнуудыг  бүртгэлжүүлж мэдээллийг ил тод байлгах, ашиглалтын гэрчилгээг чанар аюулгүй байдлын түвшингээр нь ялгах, төрийн зарим чиг үүргийг Төрийн бус байгууллагаар гүйцэтгүүлэх гээд шинэ зохицуулалтууд нэлээд бий.

Төрийн зарим чиг үүргийг Төрийн бус байгууллагаар гүйцэтгүүлэх гэдэг нь ямар учиртай юм бэ?

-Төрийн үйлчилгээний хүртээмж чанарыг дээшлүүлэх, олон шат хүнд суртлыг багасгах зорилгоор барилгын ажилтныг давтан сургах, мэргэжлийн зэрэг олгох, барилгын тусгай зөвшөөрөл олгох зэрэг төрийн ажлыг  мэргэжлийн холбоо Төрийн бус байгууллагаар аар гүйцэтгүүлэхээр заасан байгаа.  Жишээ нь  барилгын тусгай зөвшөөрөл авахтай холбоотой ямар их чирэгдэл гардгийг бид мэднэ.Тэгэхээр  өмнө нь тусгай зөвшөөрөл 28 хоногт олгогдог байсныг өөрчилж, 10 хоногт олгож байхаар тусгаж байна. Ер нь яам аж ахуйн үйл ажиллагаа явуулах биш бодлогын яам байя гэж тусгасан.

Саяхан газар хөдөлсөн. Барилга нурахад хариуцлага хэн хүлээх вэ гэдэг зохицуулалт байхгүй гэж та байнгын хорооны хурал дээр хэлсэн?

-Хуулийн зохицуулалтгүй явж ирсэн асуудал. Үүнийг одоо шинэ хуулийн төслөөр зохицуулан оруулж ирж байна. Манай яам журам гаргадаг. Нийслэлд яамнаас давсан журам гаргадаг. Жишээлэхэд газар хөдлөлөө гэхэд  барилга нурсан тохиолдолд нийслэл хариуцах уу, яам хариуцах уу гэдэг зохицуулалт өнөөдрийн мөрдөгдөж байгаа хуулиар байхгүй байна.

Баярлалаа танд амжилт хүсье.

Ж.Цэнгэл