ШҮҮХИЙН ШИЙДВЭР ГҮЙЦЭТГЭХ ЕРӨНХИЙ ГАЗРЫН ДАРГА,
БРИГАДЫН ГЕНЕРАЛ Б.БИЛЭГТ ТАНАА
2015 оны 10 дугаар сарын 05 Сүхбаатар аймаг,
Эрдэнэцагаан сум
Шүүхийн шийдвэрийг яаралтай биелүүлэх талаар гомдол гаргах нь:
Сүхбаатар аймгийн Эрдэнэцагаан сумын Иргэдийн Төлөөлөгчдийн хурлын Тэргүүлэгчдийн даргын хувиар миний гаргасан нэхэмжлэлд Сүхбаатар аймаг дахь Захиргааны хэргийн анхан шатны шүүх хэрэг үүсгэн шалгаж хэргийг 2015 оны 01 дүгээр сарын 21-ны өдөр шүүх хуралдаанаар хянан хэлэлцэж, Сүхбаатар аймгийн Эрдэнэцагаан сумын Иргэдийн Төлөөлөгчдийн хурлын 2014 оны 01 дүгээр сарын 17-ны өдрийн 03-08 тоот тогтоолуудыг тус тус хүчингүй болгож шийдвэрлэсэн. Мөн Захиргааны хэргийн давж заалдах шатны шүүхийн 2015 оны 3 дугаар сарын 12-ны өдрийн 123 дугаар магадлал, Монгол Улсын Дээд шүүхийн Хяналтын шатны захиргааны хэргийн танхимын 2015 оны 6 дугаар сарын 22-ны өдрийн 157 дугаар тогтоолоор анхан шатны шүүхийн шийдвэрийг хэвээр нь үлдээсэн.
Дээрх шүүхийн шийдвэрүүд болон миний хүсэлтийг үндэслэн Сүхбаатар аймаг дахь Захиргааны хэргийн анхан шатны шүүхийн шүүгчийн 2015 оны 8 дугаар сарын 17-ны өдрийн 49 тоот захирамжаар Захиргааны хэргийн анхан шатны шүүхийн 2015 оны 01 дүгээр сарын 21-ний өдрийн 02 дугаар шүүхийн шийдвэрийг буюу түүний дотор миний ажлыг хууль бусаар авч ИТХ-ны даргаар ажиллаж байсан Ц.Амгаланбаатар нь Эрдэнэцагаан сумын ИТХ-ын тамгыг авч зугтаасан тул тамгыг эргүүлэн олгох ажиллагааг албадан гүйцэтгүүлэхийг Сүхбаатар аймгийн Шүүхийн шийдвэр гүйцэтгэх албанд даалгасан байдаг.
Үүнээс хойш Шүүхийн шийдвэр гүйцэтгэх ерөнхий газрын Зүүн бүс хариуцсан ахлах мэргэжилтэн, ахмад н.Дашдаваа, Сүхбаатар аймгийн Шүүхийн шийдвэр гүйцэтгэх албаны тасгийн дарга, дэслэгч Ц.Баяртбаатар нараас шүүхийн шийдвэрийг биелүүлэхийг удаа дараа шаардаад 20 гаруй хоног өнгөрсөн ч одоог хүртэл тодорхой ажиллагаа явагдахгүй байна.
Шүүхийн шийдвэр гүйцэтгэх ерөнхий газрын дарга, Бригадын генерал Б.Билэгт таны тушаалаар Шүүхийн шийдвэр гүйцэтгэх ерөнхий газрын 2015 онд дэвшүүлсэн бодлого, зорилтыг хэрэгжүүлэх, шүүхийн шийдвэрийн биелэлтийг хангах, шийдвэр гүйцэтгэх ажиллагааны бодит биелэлтийг нэмэгдүүлэх, үйл ажиллагааны ил тод, тасралтгүй, шуурхай байдлыг дээшлүүлэх зорилгоор Аймаг, нийслэл дэх Шийдвэр гүйцэтгэх алба, хэсгийн шийдвэр гүйцэтгэгчдийн дунд 2015 оны 9 дүгээр сарын 02-ноос 12 дугаар сарын 02-ны өдрийг хүртэл 3 сарын хугацаанд ажил мэргэжлийн уралдаан зарласан байгаа юм байна.
Энэхүү уралдааны зорилго нь Төв орон нутгийн шийдвэр гүйцэтгэгчдийн тухайн тойргийн биелүүлбэл зохих нийт гүйцэтгэх баримт бичгийг бодитой биелүүлж, хуульд заасан үндэслэлээр шийдвэр гүйцэтгэх ажиллагааг бүрэн дуусгавар болгох, шийдвэр гүйцэтгэх ажиллагаатай холбогдуулан иргэд, байгууллагаас гаргасан гомдлыг хууль зүйн дагуу шуурхай шийдвэрлэх, шийдвэр гүйцэтгэгчээс ёс зүйн хэм хэмжээг баримтлах, цаашдын өдөр тутмын үйл ажиллагаандаа хэвшүүлэн ажиллахад чиглэгдсэн болов уу. Таны тушаалаар зарласан энэхүү уралдаан нь Монгол улсад ардчилсан Үндсэн хуулийг сахин биелүүлэх, хууль дээдлэх ёсыг хэрэгжүүлэх, Монгол улсын Ерөнхийлөгчийн хууль, шүүхийн салбарт хийж буй шинэчлэлийн хүрээнд авч буй арга хэмжээ гэж жирийн иргэд бид талархалтай хүлээн авч байгаа билээ. Хууль, шүүхийн шинэчлэлийн чухал зорилтын нэг нь шүүхийн шийдвэр гармагц нэн даруй, шуурхай, заавал биелэгдэх учиртай билээ.
Мөн Шүүхийн шийдвэр гүйцэтгэх тухай хуулийн 3 дугаар зүйлийн 3.1-д “Шүүхийн шийдвэр гүйцэтгэх ажиллагаа ... шуурхай ... байх зарчимд үндэслэнэ.”, Захиргааны хэрэг хянан шийдвэрлэх тухай хуулийн 5 дугаар зүйлийн 5.2-т “Захиргааны хэргийн шүүхийн хүчин төгөлдөр актыг Монгол Улсын нутаг дэвсгэрт байгаа холбогдох бүх байгууллага, албан тушаалтан, иргэн заавал биелүүлнэ”, Иргэний хэрэг шүүхэд хянан шийдвэрлэх тухай хуулийн 11 дүгээр зүйлийн 11.1-т “Шүүхийн хүчин төгөлдөр шийдвэрийг иргэн, хуулийн этгээд заавал биелүүлнэ”, 11.2-т “Шүүхийн шийдвэрийг сайн дураар биелүүлээгүй бол хуульд заасан үндэслэл, журмын дагуу албадан гүйцэтгэнэ” гэж тодорхой заасан байдаг.
Гэтэл дунд шатны шийдвэр гүйцэтгэгчид хууль, журам, Таны дээрх зөв, шударга шийдвэрийг биелүүлэхгүй, үл хүндэтгэсэн байдлаар хандан Шүүхийн шийдвэр гүйцэтгэх тухай, Захиргааны хэрэг хянан шийдвэрлэх тухай, Иргэний хэрэг шүүхэд хянан шийдвэрлэх тухай зэрэг хуулиудыг үл биелүүлж, цаг хугацаа алдаж байгаа нь Нэгдүгээрт Монгол улсын хууль, эрх зүйн актыг хэлбэрэлтгүйгээр сахин биелүүлэх тангараг өргөсөн, хууль зүйн салбарын төрийн албан хаагчид болох шүүхийн шийдвэр гүйцэтгэгч нар хууль, журмыг биелүүлэхгүй байх, Хоёрдугаарт Монгол улсын шүүхийн шийдвэр биелүүлэх байгууллагын шударга шийдвэр гүйцэтгэгчдийн нэр хүнд хэдэн шударга бус шийдвэр гүйцэтгэгчдийн үйл ажиллагаанаас болж иргэдийн дунд унах, Гуравдугаарт шүүхийн шийдвэр гүйцэтгэх ажиллагаа шуурхай байх хуульчилсан зарчим алдагдах, Дөрөвдүгээрт өвөлжилтийн бэлтгэл хангагдах ёстой энэ үед олон чухал шийдвэрүүд гарахгүйгээс орон нутгийн ард иргэдийн амьдрал ахуйд хүндээр тусч, өвөлжилт хүндрэх ,Тавдугаарт ИТХ-ийн ажлын албаны ажилчид болон багийн ИНХ-ийн дарга нар зэрэг 10 гаруй албан хаагчид цалингаа авч чадалгүй 3 сар гаруй хугацаа өнгөрч байгаа зэрэг бэрхшээл, эрсдэл үүсч байна.
Иймд дээрх нэр бүхий шийдвэр гүйцэтгэгч нарт зохих хууль, журмын дагуу хариуцлага тооцож, шийдвэр гүйцэтгэх ажиллагааг яаралтай хэрэгжүүлэх арга хэмжээ авч хариуг бичгээр мэдэгдэхийг хүсье.
ХҮНДЭТГЭСЭН:
СҮХБААТАР АЙМАГ,
ЭРДЭНЭЦАГААН СУМЫН ИРГЭДИЙН ТӨЛӨӨЛӨГЧДИЙН ХУРЛЫН
ДАРГА Д.НАНДИНЦЭЦЭГ
