Иргэний хөдөлгөөний удирдагч гэх томоохон сэтрийг өөртөө авсан О.Магнай Сонгинохайрхан дүүргээр гүйдэлтэй болоод удаж байна. Тэрбээр ирэх 2016 оны сонгуулиар тус дүүрэгт нэр дэвшихээр эргэлт буцалтгүй шийдсэн тул ийнхүү Сонгинохайрханыханд хайр зарлаад байгаа нь энэ. Хэн ч сонгох сонгогдох эрхийнхээ дагуу нэр дэвшихээр зүтгэж болно, тэмүүлж болно, ажиллаж болно. Гэхдээ “сүүлийн 10 гаран жил иргэний хөдөлгөөний удирдагч хийлээ хэмээн” зарлан тунхагласаар байгаа тэрбээр юуны эсрэг тэмцэл, өмнө нь юу ярьж явсанаа мартсан бололтой.

Цагтаа Магнай “Монголчуудын ирээдүйг халамжийн бодлогоор алж байна. Ухаарах, гэгээрэх, баялаг бүтээх боломжоор хангахгүй амин зуулга төдийхнөөр улс халамжлан урагшлах замыг нь хааж байна” хэмээн тунхагласаар иргэний хөдөлгөөнд орж ирж байлаа. Гэтэл өнөөдөр түүний нэр дэвших хөдөлгөөнөө өрнүүлж байгааг нь харахад хэлж ярьж ирснээсээ буцан өнөөх харлуулж муучлаад байдаг халамж руугаа, иргэдийг өчүүхнээр хуурдаг гэсэн бохир аргачлал руугаа алхаад орчихсон байгаа юм.

Мөн сонгогчдын саналыг авлигадаж авах аргаар ах нар явсаар ирсэн гэж байнга ярьдаг Магнай эдүгээ өөрөө тэднийхээ араас орчихсон “Дэлхийн зөн”-гийн нэрээр сонгуулийн шоугаа эхлээд байна.

Түүний “Дэлхий зөн”-гийнх гэх тодотголтойгоор сонгинохайрханчуудад ямар ч сав баглаагүй хувцас тараан жинхэнэ гонсойлгоод авлаа. Монголчууд хоёр систем солигдож байхад буюу зах зээлийн эдийн засагт шилжиж байсан 89-90 онуудад ч гадныхны хуучин хувцас өмсөж “доошоо” ороогүй ард түмэн. О.Магнайгийн тараагаад байгаа хувцас ямар ч сав баглаагүй байгааг бодоход хуучин байх. Ингэхээр түүнийг тус дүүргийн уулзалтад ирсэн иргэдийг доромжиллоо хэмээн дургүйцэгсэд их байлаа. Ийнхүү иргэний хөдөлгөөнийхний нэгэн төлөөлөл Магнай ямар ч үнээр хамаагүй төрийн ордонд залрахын тулд “Дэлхийн зөн”-г эхний хөрөнгө оруулагчаараа тодруулан хувцас хунарханаар нь туйлан сонгинохайрханчуудын саналыг худалдаж авахаар ажиллаж эхэллээ.

Шуурхай.мн