Ч.Сайханбилэгийн Шийдлийн Засгийн газрын хувь заяа дээсэн дөрөөн дээр дэнжигнэж байна. Ардчилсан намын фракц хоорондын зөрчлийн золиос нь түүний толгойлсон Засгийн газар байх бололтой. Дээрээс нь Дубайд үзэглэсэн Оюутолгойн гэрээ хачир нэмж таарна. “Шударга ёс” эвслээс, тэр дундаа Г.Уянга гишүүний Ч.Сайханбилэгийг огцруулахаар цугуулж буй гарын үсэг 19 хүнд нэлээд дөхөж очсон тухай мэдээллийг эх сурвалж өглөө. Одоогоор 16 гишүүн зураад байгаа, мөн нэг гишүүн зурахад бэлэн, түүний араас 18 дахь нь Шинэчлэлийн Засгийн газрын тэргүүн асан, намаасаа гарч шинэ байгуулна хэмээн З.Энхболдыгоо шантаажилж буй Н.Алтанхуяг байх гэнэ. Үүний дараагаар “Шударга ёс” эвслийн бүлгээс З.Баянсэлэнгэ, Д.Тэрбишдагва нар зурна. Бүр цаашлаад эрх баригчдын бүлгээс өдгөөгийн Засгийн газрын гишүүн Р.Бурмаа сайд зурах нь бараг тодорхой болсон. Тэрбээр кабинетынхаа тэргүүнийг огцруулахад хүчин зүтгэл гаргаж байж дараагийн засагт үлдэж чадна. Эс тэгвээс байнд ч үгүй, банзанд ч үгүй хоцорч мэдэх учир эрх баригчдын бүлгээс хамгийн их хүчин зүтгэл гаргаж байгаа хүн нь Р.Бурмаа сайд. Улмаар “Шударга ёс”-чууд Ч.Сайханбилэгийн Засгийн газрын үед Өршөөлийн хуулийн учрыг олохгүй юм байна гэдгийг мэдээд дараагийн Ерөнхий сайдтай хэдийнэ учраа олчихсон байж мэдэх сураг гарч эхлэв. Хэрэвзээ Шийдлийн Засгийн газар унаж дараагийн Ерөнхий сайдаар “Шударга ёс”-чуудын төлөвлөөгүй хүн гараад ирвэл тун чиг “аюултай”. Бүр ирэх сонгуулиас өмнө дахиад засаг ч унаж магадгүй байдалд хүрэх юм. Р.Амаржаргал гишүүн Ерөнхий сайдын албанд томилогдвол Монгол Ардын Намтай хамтарна хэмээн ил цагаан мэдэгдсэн. Түүний эл мэдэгдэл Ардчилсан намын дарга хийгээд фракцуудын дургүйг маш ихээр хүргэсэн юм. Тэгэхээр Р.Амаржаргал гишүүн Ерөнхий сайд болох нь юу л бол... Харин УИХ-ын дарга, АН-ын дарга З.Энхболдын халаасны хүн С.Эрдэнэ дараагийн Ерөнхий сайд болох магадлал тун өндөр. Тэрбээр “Шударга ёс”-чуудтай зөвшилцөөд сонгуулиас өмнө Өршөөлийн хуулийг тэдэнд ашигтайгаар шийдэж өгнө гэвэл “ногоон гэрэл”-ээр засгийг атгана гэсэн үг.
Харамсалтай нь Ардчилсан намын эл зодооны хамгийн том хохирогч нь ард түмэн байдаг нь эмгэнэлтэй. Тэдний эрх мэдэл, сандал ширээний төлөөх зодооны гэмгүй хохирогч нь ард түмэн болоод л үлддэг. Сонгууль хаяанд ирчихсэн байгаа энэ үед АН-ынханд улс орны эрх ашиг, ард түмний амьдрал, эдийн засгийн уналт огт хамаагүй бололтой юм. АН-ынхан засгаа унагаж, дараагийн ээлжийг үтэр түргэн “хоолонд” оруулж сонгуулийнхаа мөнгийг л босгох гэж улайрч байгаа нь Ч.Сайханбилэгийн Засгийн газрыг унагаах зорилготой хэсэг бүлэг хүмүүсийн улс төрөөс тодорхой харагдана. Ардчиллыг өөрийн өмч мэт санадаг өнөөгийн эрх баригчдад өгөх нэг зөвлөгөө байна. “Ардчилал” гэдэг үг чинь байн байн засгаа унагаж, түрийвчээ зузаалж, ард түмний амьдралыг доройтуулахыг хэлдэггүй юм...
С.БУЯН
