Тулгар төрийн 2225, Их Монгол Улсын 810 жил, Ардын хувьсгалын 95 жилийн ойн баярыг зохион байгуулах Комиссын ээлжит хуралдаан өнөөдөр 11 цагаас Шадар сайдын өрөөнд боллоо.

Ийнхүү хуралдаанаар төрийн их баяр наадмыг нээлт хаалтын ёслолын ажиллагааг найруулах найруулагчийг зарлажээ. Өнөө жилийн их баяр наадмын ёслолын ажиллагааг УДЭТ-ийн ерөнхийнайруулагч, Төрийн соёрхолт Н.Наранбаатар найруулан тавихаар болжээ. Энэ жилийн наадмын нээлтийн найруулагчийг нээлттэй сонгон шалгаруулсан байна. Өнгөрсөн хоёр жил Төрийн соёрхолт МУГЖ Д.Сосорбарам найруулан тавьсан билээ.

УДЭТ-ийн ерөнхий найруулагч, үзэгчдийн танил болсон “Драмын дөрөв” хамтлагийн ахлагч Н.Наранбаатарыг өнгөрсөн 2013 онд төр соёрхсон билээ. Түүний хувьд жүжиглэхээс гадна чадварлаг найруулагч гэдгээ найруулан тавьсан тайзны бүтээлүүдээрээ батлан харуулсан нэгэн. Тэрбээр “Тэнгэрийн хүү”, “Гамлет”, “Шөнө амталсан нулимс”, “Парисын Дарь эхийн сүм”, зэрэг жүжгээр театрын урлагийн шинэ илэрхийлэл, шинэлэг дэг тавилтыг бий болгож, Монголын орчин үеийн найруулах урлагийн үндэсний онцлогийг тодоор харуулсан шилдэг бүтээл туурвисан юм. Түүний хувьд МУСТА, Алтан гадас одонгоор шагнуулж байсан ийнхүү төрийн дээд шагнал болох Төрийн соёрхолт найруулагч болж түмэн олныхоо хайр хүндэтгэлийг хүлээсэн билээ.

О.Сайхан

Zaluu.com