Монголын иргэний нисэхийн байгууллагын эрх баригчид өгсөн зөвшөөрлөө буцаасантай холбогдуулан Астана-Улаанбаатар чиглэлийн нислэгээ Казахстаны иргэний агаарын тээврийн "Эйр Астана" компани цуцаллаа. "Урьд нь өгсөн зөвшөөрлөө Монголын иргэний нисэхийн салбарын эрх бүхий албан тушаалтнууд үндэслэлгүйгээр буцаасантай холбогдуулан 2016 оны зургадугаар сарын 2-ноос эхлэх байсан Казахстан болон Монголын нийслэл хоорондын нислэгийг цуцлахаас өөр аргагүй болсон тухай "Эйр Астана" мэдээлж байна" гэж албан ёсны хэвлэлийн мэдээнд дурджээ.
Тус компанийн мэдээлснээр, эхний нислэгийг эхлэхээс найман сарын өмнө "Эйр Астана" хоёр сарын хугацаанд бүрдүүлдэг бичиг баримтаа цуглуулах ажиллагаандаа орсон байжээ. "Компани Монголын агаарын тээврийн байгууллагуудын аудитын шалгалтыг амжилттай давсан. Тус улсын иргэний нисэхийн салбарын эрх баригчид 2016 оны гуравдугаар сард нисэх зөвшөөрөл олгосон байснаа 2016 оны дөрөвдүгээр сард ямар ч үндэслэлгүйгээр дангаар шийдвэр гаргаж буцаасан" гэж албан ёсны хэвлэлийн мэдээнд тэмдэглэжээ. Казахстаны ГХЯ болон Хөрөнгө оруулалт, хөгжлийн яам, тэрчлэн "Эйр Астана"-гийн хүчин чармайлтыг үл ойшоон Монголын иргэний нисэхийн эрх баригчид үндэслэлгүй хэд хэдэн шалтгаанаар зөвшөөрлөө буцаасан асуудлаа эргэж авч үзсэнгүй гэжээ.
"Нэрлэсэн шалтгаанууд дотор, ямар ч асуудалгүй давсан аудит, "Ази-Европын форум долдугаар сарын дундуур болох гэж байгаатай холбоотойгоор Улаанбаатарын нисэх буудлыг зургадугаар сард хаах гэж байгаа болон "Эйр Астана" хэзээ ч аль ч улс руу нислэг хийхэд авч байгаагүй хоригийн тухай Олон улсын иргэний агаарын тээврийн байгууллагаас гаргасан гэх баттай бус "хар жагсаалт"-ын талаар дурдсан байна" гэж дурджээ.
Монгол Улс Олон улсын иргэний агаарын тээврийн байгууллагын 1944 оны Чикагогийн конвенцийн заалтыг зөрчиж байгаа учир зохих хүсэлтийг тус байгууллагын Зөвлөлд илгээнэ гэж Казахстаны тал мэдэгдсэн байна.
Эх сурвалж: Unuudur.mn
