Өнгөрч буй парламентад Б.Гарамгайбаатар шиг эрх дархтай бас эрхийн балай байсангүй. УИХ дахь АН-ын бүлгийн дарга гэх сэтэр дор тэрбээр өнгөрсөн дөрвөн жил элдвийн дүрд тоглож, намынхаа гишүүдийн санал санаачилгын үр дүнд бий болсон “Чингис” бондоос өчнөөн төгрөг авч салхинд хийсгэснийг ард түмэн мартаагүй байгаа. Тэгвэл энэ удаад тэрбээр Чингисийн төрсөн нутаг Хэнтийд өөртөө зориулсан мандат хуваарилуулж дөнгөжээ. Улмаар үүнийгээ “Чингис хааны өлгий нутаг учраас Хэнтийд мантад өгсөн” хэмээн эзэн Чингисийн нуган үр аятай баатарлагаар өгүүлэв. Харин түүний энэ үгэнд УИХ-ын гишүүн Ё.Отгонбаяр тун аятайхан хариу барьсан байсан. Тодруулбал, тэрбээр “УИХ-ын гишүүн Б.Гарамгайбаатар Чингис хааны өлгий нутаг учраас Хэнтийд мандат өгсөн гэж тайлбарлаж байна билээ. Тэгвэл Чин ван М.Ханддоржийн нутаг Булган аймгийн мандатыг булаагаад авчихдаг нь яаж байгаа юм. Жанжин Д.Сүхбаатарын нутаг Сүхбаатар аймгийн мандатыг булаагаад авчихдаг нь яаж байгаа юм. Энэ зарчимаар цаашаа явбал Улаанбаатарын туулын хар шугуйд Хэрэйдийн Ван хааны өргөө байсан. Улаанбаатараас мандатыг нь хасах хэрэгтэй болж байна уу” хэмээн мад тавьж. Мөн УИХ-ын гишүүн Ц.Нямдорж “Б.Гарамгайбаатар ингэж хөгөө чирж байхаар өөртөө зориулаад дархан эрхтэй гишүүн болно гээд хууль баталуулчих” хэмээн ёжилсон. Харин үүнд эрхэм гишүүн ямар нэг тайлбар хийгээгүй, чимээгүйхэн суугаа юм. Яг үнэндээ Б.Гарамгайбаатар өөртөө тойрог хуваарилуулах гэж ингэтэл ядарч, нэр сүрээ алдаж суухын оронд “өвөг эцэг”-ийнхээ мөнгөнөөс чимээгүйхэн хүртээд замаа чанартайхан тавьж байвал барав биш үү.