"Чонон сүлд"-ийн цор ганц монгол жүжигчин бол Р.Анхням. Хэдийгээр уг кино дэлхийг шуугиулах хэмжээний зураг авалт, чадварлаг найруулагчийн бүтээл авч Р.Анхням бүсгүй хүчтэйхэн шүүмжлэлд өртөөд авсан. "Монгол бүсгүй уурган дээгүүр алхаж гардаггүй", "Монгол бүсгүй бэлтрэг хөнөөдөггүй", "Монгол бүсгүй хэзээ ч Хятад эрд өврөө нээдэггүй" гэж Асашёорюү Д.Дагвадорж тэргүүтэй учир мэдэх хүмүүс онлайнд үзэл бодлоо илэрхийлж байсан. Гэсэн ч Францын найруулагч Жан Жак Анно ямар монгол ёс заншлыг мэдэх биш. Р.Анхням энэ олон бүсгүйчүүдээс нүдэнд нь торсон, тэр бүтээлд оролцсон нь л гавьяа юм. Түүнийг улс эх орон нь Алтангадас одонгоор шагнасан. Нэг үе секси имижээр тодорч явсан бүсгүй нас нь явах тусам намба сууж буй тул шагнал нүдээ олсон гэж болно. Монголыг оролцуулаад дэлхийн 32 орны хэл дээр хэвлэгдсэн Жан Руны роман кино болсных жүжигчин нь дагаад л цойлчихлоо. Үнэ цэнтэй жүжигчин болсон бүсгүй саяхан Оны шилдэг уран бүтээлч шалгаруулах "Мөнгөн мод" шагналыг хүртсэн. Энэ эрчээрээ цойлоод байвал дэлхийн тайз ойрхон байна даа.

Э.Эгдэрмаа