Улсын дээд шүүхээс СЕХ-ны шийдвэрийг хууль зөрчсөн гэж үзэж, эцсийн шийдвэрийг гаргасан тул манай нам сонгуульд оролцоно гэх  зүйлийг ИЗНН-ын дарга Ц.Ганхуяг хэлсэн. Тэгвэл тус намын ерөнхий нарийн бичгийн дарга М.Хүрэлсүх өөр зүйлийг хэлж байна. Тэр хэлэхдээ “Шүүхийн шийдвэр ИЗНН-ыг сонгуульд бүртгэх ёстой гэж гарсан. Намын дарга Ц.Ганхуяг ИЗНН УИХ-ын сонгуульд оролцох боломжтой гэж яриад байгаа. Гэхдээ Үндэсний хорооноос ИЗНН нь УИХ-ын сонгуульд Ардчилсан намыг дэмжиж оролцоно гэдэг шийдвэрээ нэгэнтээ гаргачихсан шүү дээ. Хэрвээ УИХ-ын сонгуульд дангаараа оролцоно гэх юм бол анхан шатанд энэ асуудлыг эргэж ярих шаардлагатай болно, улмаар Үндэсний хороогоо зарлан хуралдуулж таарна” хэмээн хэлсэн байна.

Намын дарга Ц.Ганхуяг хэлэхдээ  “Шүүх хурал хоёр шаттай явагдсан. Өнөөдөр буюу тавдугаар сарын 30-ны байдлаар Улсын дээд шүүхийн шүүх хурал болж, хяналтын журмаар шийдвэр гаргасан. УДШ-ийн шийдвэр бол эцсийн шийдвэр юм. Тиймээс манай нам 2016 оны УИХ-ын сонгуульд оролцох эрхтэй боллоо. Бид нэгэнт хууль ёсны дагуу буруугүй гэдгээ тогтоолгосон тул ойрын хоёр, гурав хоногт багтаад нэр дэвшүүлэх ажиллагаагаа явуулна.”  гэсэн юм.

Б.Тамир

Эх сурвалж: Шуурхай.мн