Сонгуулийн тухай хуульд заасны дагуу улс төрийн намууд нэр дэвшигчээ тодруулж, олон нийтэд зарласан. Гэтэл АН-ынхан эхнээсээ учраа таарсан өрсөлдөгчөөсөө айж эхэлжээ. Тиймээс намын дарга З.Энхболдоос нь авхуулаад тойргоо сольчих санаатай сиймхий хайж яваа сурагтай. УИХ-ын дарга З.Энхболд УИХ-ын 70 дугаар тойрог буюу Баянгол дүүргийн 11, 15,16,17,18,19,23 дугаар хороонд МАН-аас УИХ-ын гишүүн Д.Лүндээжанцантай өрсөлдөхөөр учраа таарч буй. Аргатай, зальтай АН-ын дарга З.Энхболд туршлагатай хуульч, төрийн түшээ Д.Лүндээжанцанг барахгүй гэдгээ мэдсэн үү тойргоо солихоор санааширч суугаа аж. Ерөөс намын дарга нь сонгуулийн өмнө тойргоо солихоор зүтгэж байгаа цэргүүдээ галын шугаманд хаячихаад ганцаараа амиа аврахаар зугтаж буй жанжинаас өөрцгүй билээ. Нэгэнт нийтийн сонорт хүрчихсэн, нэр дэвшигчээ зоочихсон тойргуудыг өөрчлөхөөр АН-ынхан санаархаж байгаа нь зүйд нийцэхгүй гэдгийг СЕХ-ныхон хэлж буй.  Эрх баригчид даргынхаа өрөөнд тойрог зурж, өөртөө ашигтайг нь авсан ч сэтгэл ханаагүй бололтой. Зөвхөн бичиг баримтын бүрдэл дутуу нэр дэвшигчийг сольж, зургадугаар сарын 4-нөөс өмнө өөр хүнийг дэвшүүлэх хуулийн заалттай аж.  УИХ-д  нэр дэвшигчдийг тодруулах гэж З.Энхболд нам дотроо олон дайсантай болсон. Тэгэхээр дахиад холио, солио хийж эхэлбэл МАН-д биш намын нөхөддөө ялагдаж магадгүй юм.

С.Нарантуяа

Эх сурвалж: Шуурхай.мн