Сонгуулийн дуулиантай зэрэгцэн С.Эрдэнэтэй ана мана ач тач нэг тойрогт үзэлцэх хүн нь дуучин бүсгүй байна гэж сэрүүн зүүдэлсэн хүн ч үгүй билээ. Ямартай ч тэр бүсгүй дуучин хуурчин, ширээний сандалны хүүхний ажил хийдэг байсан ч "төр идсэн" тодотголд үргэлж багтдаг С.Эрдэнийн хажууд ариухан гэсэн пиар хүчээ авч байна. Тийм ч биз үгүй ч биз. Ямаан толгой царанд багтахгүй янтгар хатад зарга шүүхгүй гээд улс төрийн ертөнц уг нь хормой хот, хүүхэн шуухны явдлаас ангид байж ирсэн. УИХ саятан болгох дамжаа ч юм уу бүгд л хошууран дурлаж тэнд орлоо гэхэд нүдэн дээр амьдрал нь дээшилдэг л дээ. С.Эрдэнэ ямартай ч өрсөлдөгчтэйгөө хав дөрвөлжин золгоё гэсэн ч энгэрээс нь сүү асгардаг бүсгүй хүн, "жаал" охин байгаа тул барих барьцаа олж ядан дүлэгнэж байна. Учир мэдэх хүмүүс түүнийг ийм "тэнэг" байдалд орж бараг л 5:0 болчихоод эргэлзэн зогсож буйг нийтлэлч Баабартай холбон тайлбарлаж байна.

2015 оны сүүлээр С.Эрдэнэ, Баабар хоёрын дунд том маргаан дэгдсэн билээ. С.Эрдэнэ "Баабар гэдэг хүн удаа дараа намайг доромжилсон. Би нэг ч удаа эр хүний хувьд янз бүрийн хэл ам хийгээгүй. Гомдол санал гаргаагүй. Баабар гурван компани дээр өөрийн ажилласан жилийг нэмсэн хуурамч баримтыг бүрдүүлсэн байгаа юм. Нийтдээ зургаан жилийг нэмэгдүүлсэн байдлаар тэтгэвэрт гарсан. Энэ асуудлаар "Эрдэнэс холдинг" ХХК-иас албан ёсоор тодруулахад Бат-Эрдэнэ овогтой Батбаяр нь манайд ажиллаж байгаагүй гэдэг хариу ирүүлсэн. Гэтэл ажиллаж байсан гээд баримт бүрдүүлээд оруулчихсан байгаа юм. "Бороо гоулд" компанийн нэр дээр хүртэл 1981 онд төрсөн хүүхдийн нэр дээр өөрийнхөө регистрийн дугаарыг тааруулж хуурамч материал бүрдүүлсэн. Ийм маягаар гурван компанийн нэр дээр хуурамч материал бүрдүүлсэн. Энэ бол баримт. Баабар туйлын заргач хүн. Тэгэхээр би баримттай л ярьж байна" гэж "Цензургүй яриа" нэвтрүүлэгт орохдоо өгүүлсэн юм.

Харин Баабар "Би 1954 оны аравдугаар сарын 26-нд төрсөн. Өнгөрсөн жилийн сүүлчээр тэтгэвэртээ гарсан. Нягтлан маань миний тэтгэврийн асуудлыг хөөцөлдөөд явж байтал нам, ардчилал гээд явж байсан үе дээр маань зай гарчихгүй юу. Тэгсэн чинь 2014 оны арванхоёрдугаар сард Сүхбаатар дүүргийн НДХ-ээс манай дээр ирж шалгалт хийгээд "Энэ хугацааныхаа мөнгийг төл. Тэгвэл тэтгэвэр тогтооё" гэсэн. Ингээд 10 сая 442 мянга 913 төгрөг тушаасан. Тэр "Эрдэнэс холдинг" компанийг би мэдэх ч үгүй. Дүүргийн тэтгэврийн газрын дарга нь Эрдэнээгийн бэр нь юм байна. Миний тэтгэврийн асуудал ороод ирүүт энийг занганд хийе гэхгүй юу. Өөрсдөө "Эрдэнэс холдинг" гэдэгтэй яриад миний нэрийг оруулаад дараа нь шалгалт оруулж байгаа юм болоод нөгөөхөө илрүүлсэн байдал гаргахгүй юу. Ийм гэмт хэрэг хийсэн байна гэж би нөгөө улсад нь хэлсэн. Би тэтгэврээр амьдардаг хүн биш. Миний өгсөн 10 сая төгрөгийг буцаагаад өг. Би тэтгэвэр авахгүй гэсэн. Миний компани гэхэд сүүлийн 10 жилд улсад 2 тэрбум гаруй төгрөгийн татвар төлсөн. Би гэхэд Монголын зах зээл дээр 600 мянган ном борлуулсан хүн" гэхчлэн тайлбар өгсөн юм.

Маргаан тэгсгээд намжсан. Хоёул учир мэдэх тулхтай хүмүүс тул ойлголцолд хүрлээ гэж олон нийт олгосон. Харин сонгуулийн жил хачирхалтай нь С.Эрдэнийн өрсөлдөгчөөр тодроод буй Нараг Баабарын багийнхан илт дэмжиж байна. Цахим ертөнц сошиал медиад хүчтэй "машин" шахуу болсон baabar.mn-ийн нийтлэлч залуус Нараг дэмжин ажиллаж буй нь илт болсон. Наратай холбоотой дуулиан дэгдэх бүрт фэйсбүүкийн хүчирхэг хүмүүс болох тэд талд нь дуугарч буйг олон нийт аль хэдийнэ анзаарч эхлээд байна. Ёстой нөгөө П.Анужингийн хэлдгээр "Ньюансаар нь хийх" гэдгийг тэд чадахгүй бол өөр хэн чадах билээ.

Баабарын бүтээсэн бүхэл бүтэн том оюун санааны,  тархи угаалтын машины өөдөөс С.Эрдэнэ ямар арга барилаар үзэлцэхийг удахгүй харах биз. Баабар бол аль хэдийн үйлдлээрээ түүнийгээ арчиж хаяж байна гэж ажиглаж буй хүмүүс ярилцах болж.

Х.Онон