Амралтын өдрүүдэд Улаанбаатар хотын Замын цагдаагийн газрын ЖШУХ дээр  нийт  дуудлага мэдээ мэдээлэл  хүлээн 587 авснаас зам тээврийн ослын  401 дуудлага бүртгэгдсэн байна.  Үүнээс гэмт хэргийн шинжтэй гомдол мэдээлэл 22 бүртгэгдэж, 25 хүн  хүнд хөнгөн гэмтсэн.  Согтууруулах ундааны зүйл хэрэглэсэн үедээ зам тээврийн осолд холбогдсон жолооч 5 , явган зорчигч 3,  Зам тээврийн осолд 5 хүүхэд өртсөн. Үүнээс сургуулийн өмнөх насны 3, сургуулийн насны 2 хүүхэд. Согтуугаар тээврийн хэрэгсэл жолоодсон 132  жолоочийг илрүүлж гарч болзошгүй осол  хэргээс  урьдчилан сэргийлж ажилласан байна.

Унадаг дугуйтай хүүхэд мөргөжээ

Тухайлбал, СХД-ийн нутаг Баянхошууны зам, Өндөр настны автобусны буудлын замд S.Impreza  маркийн авто машины жолооч Б нь унадаг дугуйтай 14 настай эрэгтэй А-г мөргөж гэмтээсэн.

БГД-ийн нутаг Өргөө кино театрын хойд Сансар түргэн хоолны газрын урд Т.Carina  маркийн авто машины жолооч С нь явган зорчигч 05 настай эрэгтэй С-н мөргөж гэмтээсэн.

Орон нутгийн замд 4 хүн амиа алджээ

Хөдөө орон нутаг:  Урин дулаан цаг, оюутан сурагчдын хичээл сургууль амарч хөдөө орон нутгийг зорьсон тээврийн хэрэгслийн хөдөлгөөний ачаалал нэмэгдэж байгаатай холбоотойгоор амралтын өдрүүдэд хөдөө орон нутгийн замд зам тээврийн ослын улмаас 4 хүний амь нас хохирч, 3 хүн хүнд гэмтсэн. Тухайлбал:  Дархан уул аймгийн Хонгор сумын Цайдамын хөндий гэх газар H.Sonata  маркийн О жолоочтой авто машин онхолдож зорчигч 16 настай эмэгтэй Б -ийн амь нас хохирч , 3 хүн гэмтсэн.

Төв аймгийн Баянхангай сумын Атар-13 гэх газар H.Sonata  маркийн авто машины жолооч Г нь Northbenz  маркийн А жолоочтой авто машинтай мөргөлдөж жолооч 31 настай эрэгтэй Г -ийн амь нас хохирсон.

Орон нутгийн замд замын хөдөлгөөнд оролцохдоо жолооч та цаг агаарын байдал, замын нөхцөлд хөдөлгөөний хурдыг зөв тохируулан аюулгүй байдлаа сайтар хангаж анхаарал болгоомжтой замын хөдөлгөөнд оролцохыг сэрэмжлүүлж байна.

Д.Ундрах