Улс оронд тулгамдаад байгаа олон асуудлыг шийдэх гарц улстөрчдийн гарт бус иргэдийн гарт байгаа гэдгийг юуны түрүүнд тодотгон хэлье. Ард түмний сонголтын үр дүнд олонхоороо сонгогдсон нам дэвшүүлсэн мөрийн хөтөлбөрөө хэрэгжүүлэх боломжтой болно. Тэгэхээр гарцыг нэгэнтээ гартаа атгаж байгаа эрхэм сонгогчид маань улстөрийн намуудын дэвшүүлж байгаа мөрийн хөтөлбөртэй сайн танилцах хэрэгтэй болов уу. Тэр ч утгаараа “Хүүхдэд ээлтэй-сурах орчин” бүрдүүлэх нь МАН-ын мөрийн хөтөлбөрийн гол цөм гэдгийг тодотгон хэлмээр байна. Тэд боловсролын салбарт эрс шинэчлэл хийнэ гэж цээж дэлдээгүй ч хүүхэд бүрт сурах таатай орчин бүрдүүлнэ гэж мөрийн хөтөлбөртөө тусгажээ. Тэр дундаа гурван ээлжээр хичээллэж байгаа сургуулиудын асуудлыг цэгцлэхээр хөтөлбөр боловсруулсан байна. Өнөөдрийн байдлаар гурван ээлжээр хичээллэдэг сургууль улсын хэмжээнд 22 байна. Үүнээс 21 сургууль нь нийслэл хотынх бөгөөд гурван ээлжээр хичээллэхээс аргагүй байгаа юм. Энэ нь мэдээж анги танхимын хүрэлцээ муутай шууд холбоотой. Үндсэндээ манай улсад ерөнхий боловсролын сургуулийн хүрэлцээ нэн тулгамдсан асуудлын нэг яах аргагүй болсон. Харин одоо энэ байдлыг өөрчлөх гарц нь түрүүн хэлсэнчлэн ард түмний гарт байгаа юм. АН боловсролын салбарыг, сургууль цэцэрлэгийг тэр чигт нь орхисон бол Ардын нам энэ тухайд ямар ажил хийхээр мөрийн хөтөлбөр боловсруулав.
Төрийн эрх барьж сурсан туршлагатай МАН юуны өмнө гурван ээлжээр хичээллэдэг сургууль байхгүй болгох заалтыг тусгажээ. Ингэхдээ анги дүүргэлт хэт өндөртэй сургууль, цэцэрлэгүүдийн ачааллыг бууруулж, нэг ангид 30-аас ихгүй хүүхэд суралдцаг болгох бөгөөд гурван ээлжээр хичээллэж байгаа ерөнхий боловсролын сургуулиудыг хоёр ээлжийнх болгоно гэжээ. Хэдий сургууль, цэцэрлэгт нэг ч төгрөг төсөвлөөгүй ч засгийн эрхэнд гарсан нам зөв бодлого хэрэгжүүлбэл байдлыг өөрчлөх боломжтой. Өөрөөр хэлбэл, ямар ч ажлыг хийхэд сэтгэл дутдагаас хөрөнгө дутдаггүй гэх үг бий. Ганцхан жишээ татахад, АН-ынхан ганц сургууль шинээр бариагүй атлаа гурван сарын настай цэцэг, хогны ногоон уутанд 1-8 тэрбумыг зарцуулсан байх жишээтэй. Гэтэл энэ хэмжээний мөнгөөр багадаа 5-6 цэцэрлэг барих бүрэн боломжтой. Энэ бол эрх ашгаа эрэмбэлж чаддаггүйн хамгийн том баталгаа. Өнөөдөр манай улсад хэдхэн сарын настай цэцэг биш ганц ч болов сургууль хэрэгтэй байгаа. Харин эрх ашгаа эрэмбэлж, хэрэгцээ шаардлагаа мэдэрч сурсан тулхтай улс төрийн хүчин энэ бүхнийг соргогоор харж, мөрийн хөтөлбөрөө боловсруулсан байна. Ямартай ч МАН боловсролын салбарт тулгамдсан асуудлыг эхнээс нь эрэмбэ дараатайгаар шийдэх хөтөлбөр боловсруулж, гарцаа тодорхойлсон. Харин одоо иргэн таны сонголтоос хамаарч, энэ бүх зорилт хэрэгжих эсэх нь тодорхой болно гэдгийг хэлэх байна.
Эх сурвалж: Шуурхай.мн
