УИХ бол хууль тогтоох төрийн дээд байгууллага. Тиймээс улс төрийг  ойлгодог, иргэдийнхээ жаргал зовлонг хуваалцдаг, төрийн ажлыг мэддэг,  хуулиа хүндэлдэг зөв хүнээ сонгох хамгийн чухал хариуцлагатай мөч сонгогч та бидний өмнө ирээд байна.

Нэр дэвшигчдийн өнгө, сонгуулийн дүр төрхийг харахад зарим дүүргийн сонгогчид нь азтай, одтойгоороо бардаж, харин зарим дүүргийн сонгогчид хуваарилалт нь шог байна хэмээн халаглаж суугаа  бололтой.  Дуулж, бүжиглэх, шүлэг хэлэх авъяасыг нь мэдэхээс хийсэн ажлыг нь мэдэхгүй нөхдүүд гараад ирвэл парламент парламент биш, төр төр биш болно.

Хан-Уулынхныг азтай гэж атаархах сонгогч нийслэлд олон. Тухайлбал,  тус дүүрэгт буюу УИХ-ын 55 дугаар тойрогт Ардчилсан намаас тус дүүргийн Засаг дарга Ж.Ганхуяг өрсөлдөж байгаад иргэд нь тааламжтай сууна. Учир нь Ж.Ганхуяг бол дүүрэгтээ шинэ хүн биш. Тэгээд ч тэр Хан-Уулын иргэн. Нутгаа дүүргээ хөгжүүлье гэж хүн болгон боддог шиг тэр Хан-Уулаа хөгжүүлэх том мөрөөдөлтэй залуу.

Дүүргийнхээ жаргал, зовлон, асуудал болгоныг арван хуруу шигээ мэддэг тэрбээр төрд гарвал дүүрэгтээ илүү их хөрөнгө оруулалтыг татаж, илүү том бүтээн байгуулалтыг эхлүүлэх нь дамжиггүй.

Иймээс зөв хүнээ гаргаж чадвал дүүргээрээ хөгжиж чадна гэсэн үг.  Төрд ярьдаг, уйлдаг, жүжиглэдэг, хий мөрөөддөг, сул дорой хүн хэрэггүй. Монголын төрд, Монголын парламентад үгүйлэгдэж байгаа гол зүйл бол төр түшилцэхэд бэлтгэгдсэн, хууль боловсруулах дадал чадвартай, мэдлэг боловсролтой гишүүд үгүйлэгдэж байна.  Улс төрд үгүйлэгдсэн орон зайг нөхөхөөр УИХ-ын сонгуульд өрсөлдөж байгаа залуусаа дэмжмээр байна.  Яг үнэндээ хүнээ зөв таньж, шийдвэрээ мэргэн гаргахаас  таны амьдрах орчин, авах цалинд ч нэмэртэй байх болно.

Би бусад дүүргийн сонголтгүй сонгогч. Харин Хан-Уулынхан азтай юм. Аятайхан хүмүүс ч өрсөлдөж байна. Гол хүнээ зөв таньж, нэрээ зөв дугуйлаарай гэж сонгогчоос сонгогчдодоо захиж байна.

Б.Түвшин

Unen.mn