-Авлигын гэмт хэрэг Монгол Улсын Үндэсний аюулгүй байдалд нөлөөллөө-

Өнгөрсөн мягмар гараг буюу уржигдар нэр бүхий хүндтэй шүүгч нар авлигалын хэргийг хэрхэн яаж шийддэг, хуулийн цоорхойг ямар үед ашигладаг гэдгийг Монголын ард түмэнд утгаар нь харуулсан. Ингэж хэлэхийн учир нь 2017 оны арванхоёрдугаар сард АТГ-ын мөрдөгчид МХЕГ-ын Хилийн хорио цээрийн хяналтын газрын дарга асан Э.Аззаяа, хэлтсийн дарга асан Б.Баярсайхан нарын 20 гаруй албан тушаалтныг бусдаас их хэмжээний авлига авч байхад нь гүйцэтгэх ажиллагаа явуулж тэднийг үйлдэл дээр нь барьж байв.

Ингэхдээ эдгээр албан тушаалтны гэрт нэгжлэг хийхэд Хилийн хорио цээрийн хяналтын газрын дарга нар тус бүр 200 гаруй сая төгрөг хадгалж байсныг хураан авсан түүхтэй. Бүтэн хоёр жил гаруй хугацаанд АТГ-ын мөрдөн байцаагчид хөлс хүчээ шавхан тэдэнтэй холбоотой нотлох баримтыг бүрдүүлж Нийслэлийн прокурорын газар руу шилжүүлж прокурорууд мөрдөгчдийн олж тогтоосон хавтаст хэрэгт яллах дүгнэлт үйлдэн Чингэлтэй дүүргийн Эрүүгийн Анхан шатны шүүхэд шилжүүлжтэл тэдний хэргийг хөөн хэлэлцэх хугацаа дууссан гэх үндэслэлээр хэргийг нь хэрэгсэхгүй болгож авлигачдын толгойг илж дахин тэднийг бусдыг дарамталж авлига авахыг зөвшөөрчихөв.

Бид өмнөх дугаартай шүүхийн шийдвэр хэрхэн гарсан талаар мэдээллэсэн учраас дахин нурших нь илүүц биз ээ. Ямартай ч тус дүүргийн шүүгчид хуулийн цоорхой болсон ХӨӨН ХЭЛЭЛЦЭХ хугацаа гэх нэр томьёололыг нэр бүхий дарга асан нарт овжиноор ашиглаж хавтаст хэргийг хав дарж хэвтчихээд хэрэгсэхгүй болгох шийдвэр гаргасан нь “авлгиачидыг Монголын шүүх өөгшүүлнэ” гэдгийг бодитоор харуулж хөрөнгө мөнгөний өмнө сөгдөж сөхөрч суулаа.

Хэрвээ шүүгчид хууль дүрмээ барьж хавтаст хэргийг хав дараагүй бол Э.Аззаяа, Б.Баярсайхан нарын хэргийг үнэн зөвөөр шийдэж тэдэнд ял ногдуулах бүрэн боломж байсан ч тэд хүссэнгүй. Хэдийгээр бид өнөөдөртөө яагаад гэдгийг нь баримттайгаар хэлж чадахгүй ч магадгүй маргааш, нөгөөдөр шүүгчдийн булхай луйварыг илчлэх нэгэн гарч ирнэ гэдгийг баттай хэлчихье.

Яг үнэндээ тэд хуулиар хүлээсэн чиг үүрэг болох экспортын тусгай зөвшөөрөл олгохдоо эрх мэдлээ урвуулан ашиглаж, хахууль авдаг байсан нь мөрдөн байцаалтаар тогтоогдсон гэдгийг мөрдөгчид хэлж байна. Тухайлбал, хилээр самар, мах, дэрвэгэр жиргэрүү гаргах тусгай зөвшөөрөлтэй аж ахуйн нэгжүүд МХЕГ-ын Экспорт, импорт, хилийн хорио цээрийн хяналтын газраас дахиж гэрчилгээ авч, бараагаа нэвтрүүлдэг бөгөөд үүн дээр нь Э.Аззаяа, Б.Баярсайхан нар ажиллан хэтэвчээ зузаалсан гэдэг нь мөрдөн байцаалтаар тогтоогдсон. Тэд уг гэрчилгээг олгохдоо тухайн барааны хэмжээг хувилж тодорхой хэмжээний мөнгөн дүнд шилжүүлээд нэхдэг байв. Тухайлбал, нэг аж ахуйн нэгж 5300 ам.доллар төлөх ёстой болсон бөгөөд байгаа нь 5100 ам.доллартай тэнцэх төгрөг байсан аж. Гэтэл тэд гүйцээж ир гэх хоёрхон үгийг хэлж гэрчилгээг нь олголгүй хөөн гаргасан тохиолдол ч байсан тухай мэдүүлэг хавтаст хэрэгт авагдсан гэрчийн мэдүүлэг ч байдаг юм билээ.

Тэгэхээр эрх мэдлээ урвуулан ашиглаж 20 гаруй аж ахуйн нэгжийг дарамталж хөрөнгө зоорь цуглуулсан энэ мэт авлигачин дарга нарыг Монголын шүүх өршөөн хэлтэрүүлсэн нь авлигын гэмт хэрэг Монгол Улсын Үндэсний аюулгүй байдалд нөлөөлж эхэллээ Ерөнхийлөгч өө.

Erennews.mn