Химичдийн цагаан толгой болох “Химийн элементийн үелэх систем зохиогдсоны 150 жилийн  ойн”-г тохиолдуулан Монголын химичдийн дунд “Greensport 2019” спортын тэмцээн зохиогдож байна. Тэмцээнд “Эрдэнэт үйлдвэр ХХК” болон Улаанбаатар хотын химийн бодис, лобараторитой холбоотой нийт 58 байгууллага аж ахуйн нэгжийг төлөөлж 760 тамирчин оролцож байна. Хоёр өдрийн туршид үргэлжлэх “Greensport 2019” тэмцээний хүрээнд баг тамирчид спортын 4 төрөлд 7 багц медалийн төлөө хурд хүч, ур чадвараа сорин өрсөлдөх юм. Тэмцээнийг “Монголын спортын шүүгчдийн холбоо”-ны гишүүн Энхтуул ахлагчтай мэргэжлийн шүүгчид шүүн явуулж байна.

Тус арга хэмжээний талаархи дэлгэрэнгүй мэдээллийг “Greensport 2019” тэмцээнийг зохион байгуулах комиссын гишүүн, Монгол улсын химийн анхдугаар олимпын аварга “Эрдэнэт үйлдвэр ХХК”-ны химийн бодис хариуцсан мэргэжилтэн Р.Улаанхүү-с тодруулсан юм

-Энэхүү “Greensport 2019” тэмцээний талаархи таны сэтгэгдэл?

- “Химийн элементийн үелэх систем зохиогдсоны  150 жилийн  ойн”-н арга хэмжээ энэ онд тохиож байгаа. Энэ арга хэмжээг уялдуулаад Монгол улсын нийт химичдийн дунд спортын тэмцээн  өнөөдөр, маргааш хоёр өдөр Монгол улсын их сургууль дээр зохион байгуулагдах гэж байна. Энэхүү арга хэмжээний ерөнхий зохион байгуулагч Грийн химистри ХХК-ны хамт олонд талархал дэвшүүлэе. Тус компаний захирал Даваасүрэндээ баярлаж байгаагаа хэлье. Монгол улсын нийт химичдийн дунд ийм сайхан спортын арга хэмжээ зохион байгуулагдаж байгаад миний хувьд сэтгэгдэл маш өндөр байна. Монгол улсын нийт химичдэдээ ажил хөдөлмөрийн өндөр амжилт хүсье. Химийн шинжлэх ухаан буюу химийн салбар гэдэг бол улс орны хөгжилд ашиг тус авчирсан маш сайхан салбар юм аа. Монгол улсад химийн шинжлэх ухаан, химийн салбар хөгжих чухал шаардлагатай цаг үе нь иржээ. Мал аж ахуй, газар тариалан, уул уурхай гэх мэт бүхий л салбарт химийн шинжлэх ухааны өндөр түвшний мэргэлжинтэнгүүд нэн шаардлагатай байна.

Өнөөдрийн энэхүү тэмцээнд маань 58 байгууллагын 760 жаран тамирчин оролцохоор бүргүүлсэн байгаа юм. Оролцож буй байгууллага баг тамирчдын тоог харахад тус тэмцээний цараа, багтаамж ямархан хэмжээнд явагдаж байгааг тодхон харуулж байна аа. Монгол улсын уул уурхайн салбарт химийн шинжлэх ухааныг өндөр түвшинд хөгжүүлэн түүчээлэн авч явж байгаа толгой байгууллага нь манай Эрдэнэт үйлдвэр байгааг хэлэхэд бас таатай байна.

-Химийн шинжлэх ухаан Монгол улсад ямар хэмжээнд хөгжиж байна вэ?

-Монгол улсад химийн шинжлэх ухаан, химийн салбар хөгжих цаг нь бол ирсэн байна. Мал аж ахуйн хими, газар тарилангийн хими, хүнсний хими, нефтийн хими, уул уурхайн хими гээд химийн шинжлэх ухаан ороогүй юм Монгол улсад одоо алга байна. Мал аж ахуй, газар тариалан, уул уурхай гээд химийн бүх түүхий эд нь Монгол улсад байна. Мөн химийн салбарын бүх мэргэжилтэн боловсон хүчин нь бүгд байна. Шаардлагатай зүйл нь төр засгийн зүгээс дэмжлэг туслалцаа үзүүлж манай салбарт тодорхой бодлого хэрэгжүүлвэл жижиг дунд үйлдвэрлэл төвөггүй хөгжих цаг нь ирчихсэн байгаа юм. Монгол улс шавхагддаг, дуусдаг баялаг болох дан ганц уул уурхайн салбар дээр түшиглэн хөгжлийн бодлогоо барих биш хими химийн шинжлэх ухааны салбарт тодорхой хөрөнгө оруулалт хийж төрийн бодлого хэрэгжүүлбэл мал аж ахуй, газар тариалан, хүнсний салбар маань аяндаа хөгжиж Монгол улсын эдийн засагт том түлхэц өгөх юм аа.