Ертөнцийн буурал мэлмийд нэгэн он айлчилж, ер бусын учрал ерөөл дүүрэн 2020 он түүх болон үлдлээ. Монголчууд бид улиран одсон онд дэлхий нийтийг хамарсан цар тахалтай нүүр тулан тэмцэж, нийгмийн амьдралд чамгүй хүндрэл тулгарсан ч төр засгийн оновчтой бодлого, ард түмнийхээ идэвх чармайлтаар гарз хохирол багатай даван туулжээ. Эдийн засгийн хувьд дэлхийн олонх улс орнуудын адил хямрал нүүрлэсэн ч их бүтээн байгуулалт, үндэсний хэмжээнд өрнүүлсэн ажлаа огт цалгардуулаагүйг шинжээчид өгүүлж байна. Манай “TUMEN.MN” сайтын хувьд ч хэвлэл мэдээллийн үүргээ гүйцэтгэж, уншигч тантай хамт өдөр шөнө, өвөл зуныг үл харгалзан хамт байлаа. Хараат бус, мэргэжлийн ёс зүйгээ сахиж, мэдээллийн тэнцвэртэй байдлыг эрхэмлэн уншигч танаа хүрч чадсан гэдэгтээ итгэлтэй байна.

Манай сайт нь үндэсний их бүтээн байгуулалт Тавантолгой, Зүүнбаян чиглэлийн төмөр замын трасст, Сайншандын Газрын тос нэрэх үйлдвэрийн халуун талбарт, орон сууц барилгажуулалтын их ажил дунд, ээрэм талд зурайсан их замын тэнхлэгт, малчны хот, тариаланчдын талбайд гээд мэдээ мэдээлэл түгээх ажлаа цалгардуулахгүйг хичээн ажилласан юм.

Бид уншигч таныг эх орны баруун зах Алтайн Таван богдоос зүүн хязгаар Соёлз уул хүртэл, өмнөд хил Орвог гашууны бор толгойгоос эх орны хоймор орших Монгол шарын даваа хүртэл мэдээ мэдээллийн өргөн орон зайд аялуулсан гэдэгтэй итгэлтэй байна. Ийнхүү уншигч та улиран одсон 2020 оны ололт амжилтаа бататган, айсуй 2021 онд эрүүл энх, ажил хөдөлмөрийн гялалзсан их амжилттай тодоос тод гэрэлтэж явахыг хүсэн ерөөе. “Эрүүл явбал улсын наадам үзнэ” хэмээн их зохиолч Д.Нацагдорж хэлсэнчлэн бид хамтдаа аюулт өвчнийг даван туулж, айсуй өдрүүдийн гэрэл гэгээнд бултаар жаргана гэдэгт итгэлтэй байна.

“TUMEN.MN” сайтын редакци