Энэ удаагийн УИХ-ын сонгуульд МАН-аас нэр дэвшигчдийн дунд Ерөнхийлөгч У.Хүрэлсүхийн фракцынх гэх тодотголтой цөөнгүй нэр дэвшигч бий. Тэдний нэг болох Батлан хамгаалахын сайд Гүрсэдийн Сайханбаяр сонгууль хаяанд тулсан энэ өдрүүдэд томоохон асуудалд холбогдчихлоо. УИХ-ын сонгуулийн 1-р тойрогт нэр дэвшсэн Г.Сайханбаярын сонгуулийн ухуулагч хүний аминд хүрсэн хэрэг нийгмийн анхаарлын төвд байна. Түүнчлэн ийм харамсалтай хэрэг явдал гарчихаад байхад Г.Сайханбаяр нь нэр дэвшигчийн хувиар сурталчилгаагаа үргэлжлүүлэх нь ёс зүйн хувьд үнэхээр зохимжгүй гэх хандлага олны дунд давамгайлж буйтай зэрэгцэн тэрбээр хэвлэлийнхэнд байр сууриа илэрхийлэхдээ, эрдэнэт хүний амь нас эрсэдсэн явдалд талийгаачийн ар гэр, төрөл төрөгсдөд гүн эмгэнэл илэрхийлсэн ч шүүмж дагуулахаар үгсийг бас хэлсэн.
Тодруулбал, тэрбээр "Нам нэр дэвшигчийн нэрийг татах үндэслэл байхгүй. Хоёр л тохиолдолд нэр дэвшигчийн нэрийг татдаг. Нэг нь нэр дэвшигч амиа алдсан бол. Нөгөөх нь шүүхээс хүчин төгөлдөр шийдвэр гарсан тохиолдолд татдаг. Би сонгуулийн сурталчилгаагаа үргэлжлүүлнэ. Ухуулагч нь миний нэр дээр бүртгэгдсэн байсан юм билээ. Гэхдээ тэрхүү ухуулагчийг би танихгүй, таних боломжгүй" гэсэн юм. Өөрийнх нь нэр дээр бүртгэгдсэн ухуулагч бүхэл бүтэн хүний эрдэнэт амийг сонгуулийн сурталчилгааны үеэр хөнөөчихөөд байхад ийм зүйл ярьж болохгүй л дээ. Хэдийгээр энэ асуудал нэр дэвшигчийн нэрийг татах үндэслэл хуулийн хувьд болохгүй ч сурталчилгаагаа зогсоох хэмжээний ёс зүй улстөрч хүнд ийм цаг үед байх ёстой юм. Гэсэн мөртлөө нийт нэр дэвшигчдээ ёс зүйтэй өрсөлдөхийг уриалж байна гэж яриад буй нь утгагүй юм.
Ямартай ч МАН-ын ерөнхий нарийн бичгийн дарга Д.Амарбаясгалан Г.Сайханбаярын сонгуулийн сурталчилгааг зогсоох шийдвэрээ албан бичгээр СЕХ-нд хүргэсэн. Тэрбээр, нэр дэвшигч Г.Сайханбаярын хувьд тухайн гэмт хэрэгт холбогдогчтой уулзаж, гэрээ хэлцэл байгуулаагүй ч МАН-ын зүгээс сонгуулийн үйл ажиллагааг илүү хариуцлагатай, эмх замбараатай явуулах үүднээс уг шийдвэрийг гаргасан хэмээн тодотгосон. Мэдээж уг үйл явдлын цаана У.Хүрэлсүх, Л.Оюун-Эрдэнэ нарын хооронд ээлжит хэлэлцээ явж буй биз ээ. У.Хүрэлсүх Ерөнхий цэргийн сургуульд хамт сурч байсан Бригадын генерал Г.Сайханбаярыг өөрийн удирдаж буй кабинетдаа Батлан хамгаалахын сайдаар авчирж байсан замналтай. Түүнчлэн найзыгаа 126 гишүүний нэг болгохоор сойсон ч ийнхүү "морьдохын хазгай" болоод байна.
Tumen.mn
