No Doubt хамтлагийн дуучин Гвен Стефани одоо 54 нас хүрчээ. Сүүлийн 7 жилийн турш урлагаасаа холдож, завсарлага авсан дуучин тайзнаа эргэн гарч, шүтэн бишрэгчдээ баярлуулахаар яарч байгаа юм байна. 11 дүгээр сарын 15-нд шинэ цомог гаргахаар бэлтгэлээ бүрэн хангаснаа зарлаад цомгийнхоо нүүр зургийг ч дэлгэн харуулжээ.

Зургийг харвал ковбой малгай, судалтай хүрэмнээс нь кантри цомог гэдэг нь ойлгомжтой харагдана. Нөхөр Блэйк Шэлтон нь кантри дуучин тул үүнд гайхах ч юу байхав. 2015 онд No Doubt хамтлаг тарсан юм. Харин Гвен Стефанигийн хувьд сүүлийн хэдэн жил уран бүтээлийн уналтад орж, дуу бүтээх гэсэн ч чадахгүй байснаа ярьсан удаатай. Гурван хүүтэй хэрнээ тэднийгээ ч харж хандаж чадахгүй, мөн дуугаа ч бичиж чадахгүй байсан үеийнхээ талаар Гвен Стефани ярихдаа “Бурхан минь, би тэгэхэд гэртээ оройн хоолоо ч идэж чадахгүй, тэгсэн хэрнээ бас ганц ч дуу бичиж чадахгүй байсан. Бүтэн өдрийг хий дэмий өнгөрүүлж буйдаа маш их бухимддаг байлаа” хэмээн дурссан байдаг.