Хүн нээрээ сонин шүү. Хэрэгт хачин ихээр дурлана. “Яасан гэнэ ээ?” гэж ирээд ба, бэгүй мэдэх гэж хичээнэ. “Этик” продакшны жүжигчин С.Одбаяр хүн зодож гэнэ ээ. Монгол даяар нэг яриа. Фэйсбүүкээр нэг хов жив.

Тус продашкны жүжигчин Г.Даваазул энэ тухай мааз гэж тайлбарлалаа. Түүнд нь итгэх, итгэхгүй хүмүүс ч байна. Хүн бүрийн харах өнцөг өөр учир юуг үнэн гэж итгэхийг нь хэн ч таашгүй. Нэг хэсэг нь “Утааны асуудлыг сарниулахын тулд ийм бичлэг цацаж байна” гэж сэрдлээ. Тийм ч байж болно, үгүй ч байж мэднэ. Үнэн хаана байгааг мэдэхгүй учир бодит байдалд ойртуулах гээд үзье.

Юутай ч энэ бичлэг урлагийнхан дунд увайгүй явдал байдгийг дахин харууллаа. С.Одбаяр найзыгаа үнэхээр зодсон бол хажуугаас нь бичлэг хийхийг зөвшөөрөх үү? Хэн ч хүн зодож байгаа баримтаа үлдээхгүй. Утсыг нь булааж аваад, бичлэгээ устгачихна. “Бичлэг хийж байгааг мэдэхгүй болтлоо улайрчихсан, бас согтуу байсан юм биш үү” гэж үү? Ингэж тайлбарлах хүн ч бий. Байж болох л таамаг. Ингээд “С.Одбаяр хүн зодсон гэдэг үнэн” гэж харвал тэр үнэхээр увайгүй хүн болж таарна.

Г.Даваазулын хэлснээр маазарсан бол яах вэ? Маазарсан бичлэгээ хадгалж байгаад, алдчихсан бол хулгайч нь “Этик” продакшнтай их ойрхон байж таарна. Нийлж наргичхаад, дараа нь үнэн мэт болгож, бусдад зарах нь увайгүй үйлдэл.

Энэ продакшныхан хэрвээ өөрсдөө зориуд ийм зодоон дэглэсэн бол бүүр ч увайгүйд тооцогдоно. Утаа, ханиад томуу, Евразийн эдийн засгийн холбоотой хийж буй чөлөөт худалдааны хэлэлцээ гээд нийгэм асуудал ихтэй, нийтээрээ хэл амаа билүүдчихсэн яваа. Энэ үед “Этик”-ийнхэн улстөрчдөөс мөнгө авч, зодооны бичлэгээрээ нийгмийн асуудлыг нийтийн ой санамжаас арчих гэсэн бол үнэхээр явайгүй хүмүүс юм.

“Этик”-ийнхээ ирээдүйг өөрсдийн гараар үгүй хийж, уран бүтээлийнхээ замыг ёсзүйгүй явдлаар дуусгах ёсзүйгүй санаа тэднээс гараагүй гэж найдъя. Урлагийн салбарт ёсзүй тогтох ёстой. Урлагийнхан ёсзүйн хэм хэмжээгээ баримтлах ёстой. Олон нийт ч үүнийг хүсэж, шаардаж байна. “Никитон”-ы Б.Батчулууныг онигоо ярих гээд хэргээ илчлэхэд нь хүмүүс түүний ёсзүйгүйг мэдэж, олны танил хүн ёсзүйтэй байх ёстойг сануулж, шаардлага тавьсан. Тэгэх ч ёстой. Болдог юм болдгоороо болсон.

Улстөрчид биднийгээ хонь хэмээн харж, хаашаа туухаа, хаана бэлчээхээ, хэзээ усалж, хэдийд идээшлүүлж, хэрхэн хашихаа шийддэг болсон

Түүнээс хойш харин мэдэхгүй. Сексцагаан богд гэх рэппэр Б.Гантулга найз охиноо зодсон нь гэмт хэрэг. Гэхдээ тэр зодоон нэлээд дээр үед болсон гэж тэд өөрсдөө тайлбарласан. Гэмт хэргийг үйлдэл дээр нь баримтжуулаад, улстөрийн зорилгоор ашиглачихсан болж таарсан. Улстөрийн зорилго байгаагүй бол тухайн үед нь, найз охиноо зодсон даруйд нь цацахгүй яагаав.

Рэппэр Roockie буюу У.Мөнхбагана энэ оны 5-р сард CU сүлжээ дэлгүүрийн худалдагчийг цохиж, Зөрчлийн тухай хуулиар арга хэмжээ авахуулсан ч тэр бичлэг нь 11-р сард олон нийтийн сүлжээнд тавигдсан. Тэр үед Монгол Улсын төсвийг УИХ 1.9 их наяд төгрөгийн алдагдалтай баталчхаад, ард түмний дургүйг хүргэж байлаа. Энэ мэтчилэн улстөрчдийн увайгүй явдалтай урлагийнхны увайгүй үйлдэл давхцаад байгаа нь сонин. Санамсаргүй ч байж болно. Хорвоо баян л даа.

Улстөрчид сэтгэл, мэдрэмжээрээ нэгдсэн хүмүүс (экспрессив бөөгнөрөл)-ийн онолд тулгуурлан, олон нийтэд урлагийнхны увайгүй үйлдлийг харуулсан бичлэг цацаж, анхаарлыг нь чухал асуудлаас холдуулж байгаа ч байж мэднэ. Учир нь бөөн олон хүн буюу олон нийт бодит амьдралыг зүүд мөрөөдлөөс, шинжлэх ухааныг үл гүйцэлдэх онолоос ялгаж чаддаггүйг эртний гүн-ухаанчид хэдийнэ тогтоочихсон. Энэ тухай МЭӨ IV зууны реформатор, Эртний Афины улстөрч Солон “Ганцаараа байгаа афин хүн үнэг шиг зальжин. Харин бөөгнөрөн цугласан тэднийг хонин сүрэгтэй адилтгаж болно” гэж тодорхойлжээ. Афин ч бай, монгол ч бай Дэлхийн бүх хүн яг ийм.

Тиймээс л манай улстөрчид биднийгээ хонь хэмээн харж, хаашаа туухаа, хаана бэлчээхээ, хэзээ усалж, хэдийд идээшлүүлж, хэрхэн хашихаа шийддэг болсон. Үүний нэг илрэл нь “Этик”-ийн жүжигчдийн зодоон байж мэднэ. Хэрвээ тийм бол “Этик”-ийнхэн хонинд хаяж өгсөн өвс гэсэн үг. Ийм өвсийг идмээргүй байна, бүгдээрээ. Хонин сүрэг биш, хүн байх хэрэгтэй байна. Шинэ, хуучин, боодолтой, задгай ямар ч өвс шидэж өгсөн идэхгүй байж, агаарын бохирдол, Евразийн эдийн засгийн холбоотой байгуулах гэж буй чөлөөт худалдааны гэрээндээ анхаарцгаая л даа! Хонь биш, хүн бол шүү дээ.

Эх сурвалж: Time.mn