Улаанбаатар хотын захирагч Х.Нямбаатар өнөөдөр /2025.08.11/ Тээврийн цагдаагийн албаныхныг түгжрэл бууруулах хүрээнд ажлаа хийсэн шиг хийхийг шаардлаа.

Энэ талаар тэрбээр “Замын хөдөлгөөний дүрэм зөрчөөд, урсгал сөрөөд, зогсдоггүй газар автомашинаа зам хаагаад тавьж байна. Улаанбаатар хотын гудамжаар дүүрэн нэгдүгээр эгнээнд машинууд хөдөлгөөн хаагаад зогсож байна. Нөгөө олон хүн хүч хаяж байгуулсан цагдаагийнхан та нар хаана юу хийж байгаа юм бэ. Замын хөдөлгөөний удирдлагын төв/ЗХУТ/-д өчнөөн хөрөнгө оруулалт хийж, бид нар камерын нэгдсэн системийг бий болгосон. Цагдаагийн байгууллага камерын нэгдсэн системийг өдөр, цаг, секундээр нь харж байгаад хаана зөрчил гарч байгааг харж болно. Энэн дээр замын цагдаа юу хийж байгаа юм. Тээврийн цагдааг ажлаа хий гэж хэлье.

Би Хууль зүй дотоод хэргийн сайд байхаасаа эхлээд дөрөв таван жилийн турш цагдаагийн байгууллагын тоног төхөөрөмж, парк шинэчлэлтийг тасралтгүй хийж байгаа. Та нар орж ирэхээрээ юу ярьдаг вэ. Машин шинэчил, тоног төхөөрөмж шинэчил, камер авч өг. Бүгдийг шийдсэн. Нэгж байгуул гэсэн байгуулсан. Одоо та нар ажлаа хий л дээ. Бид нар зам өргөсгөөд нэг км замыг шугам сүлжээтэй нь гурав, дөрвөн тэрбумаар өргөтгөж байгаа. Гэтэл өргөтгөсөн эгнээн дээр төлбөртэй зогсоол дээр машинаа тавихгүй гэж байгаа хэдэн нөхөд бүтэн өдөр тавьчихаж байгаа. Одоо та нар өдөр оргил ачааллын үеэр хотын төвийн гудамжаар яваад үз. Хоёрхон урсгалтай замын нэгдүгээр эгнээг нь машины зогсоол болгосон. ТЕДИ, Халдвартын эмнэлгийн замын нэгдүгээр урсгал дээр нь автомашинаа хаагаад тавьж байна. Ажлаа хийцгээ” гэв.