Монгол улсын Засгийн газар, МҮХАҮТанхимаас хамтран жил бүр улсынхаа нийгэм, эдийн засаг, бизнесийн хөгжилд жинтэй хувь нэмэр оруулж буй шилдэг 100 аж ахуйн нэгжийг шалгаруулдаг билээ.

Энэхүү арга хэмжээнд Төрийн банк төрийн өмчит компаниуддаа тэргүүлэн ТОП-20 аж ахуйн нэгжийн нэгээр шалгарч өргөмжлөлөө гардан авлаа. Энэ жилийн шалгаруулалтын онцлог нь тухайн аж ахуйн нэгжийн албан ёсны мэдээ, тайланг үндэслэн Сангийн яам, Санхүүгийн зохицуулах хороо, Үндэсний статистикийн хороо, Мэргэжлийн хяналтын ерөнхий газар, Татварын ерөнхий газар, Нийгмийн даатгалын ерөнхий газар, Гаалийн ерөнхий газрын хамтарсан ажлын хэсгээс шалгаруулсан явдал юм.

2014 онд Төрийн банкны нийт актив 2,04 их наяд төгрөгт хүрч, банкны чанарыг илэрхийлдэг үндсэн үзүүлэлт болох хугацаа хэтэрсэн зээлийн активт эзлэх хувь 0.5 хувь байгаа нь банкны салбарын дундаж үзүүлэлтээс эрс сайн үзүүлэлттэй гарсан.  Харилцагчдын банкинд итгэх итгэлийн илэрхийлэл болох татан төвлөрүүлсэн хөрөнгийн хэмжээ 1,8 их наяд төгрөгт хүрч, оны эцсийн байдлаар 19,3 тэрбум төгрөгийн цэвэр ашигтай ажиллаж Монголбанкнаас тогтоосон зохистой харьцааны шалгуурыг  бүхий л үзүүлэлтээрээ тогтмол давуулан биелүүлж ажиллалаа.

Мөн олон улсын 4 том аудитын байгууллагын нэг Ernst & Young компаниар 2011, 2012, 2013, 2014 оны санхүүгийн тайлангаа баталгаажуулж, олон улсын стандартад амжилттай шилжсэнээс гадна олон улсын үнэлгээний 3 том байгууллагын 2 төлөөлөл болох Moody’s, Fitch Ratings байгууллагуудаар үнэлгээ хийлгэж, “B” буюу сайн үнэлгээ авснаар Монгол Улсын арилжааны банкуудынхаа хамгийн өндөр үнэлгээ бүхий банк болсон зэрэг ололт амжилтаар дүүрэн жил байлаа.

Бидний амжилт бол харилцагчдын маань бидэнд үзүүлсэн итгэлийн илэрхийлэл байдаг бөгөөд Та бүхний Төрийн банкны хөгжил дэвшил, амжилтанд оруулсан хувь нэмэрт тань чин сэтгэлээсээ талархал илэрхийлье.

Эрсдэлгүй ирээдүйн баталгаа-Төрийн банк