Тунис улсад гадаадын жуулчдыг олноор нь хядсан аллага гарчээ. Үзэсгэлэнт Эл Кантоу эрэг дээр амарч байсан гадны жуулчдыг зэрлэг балмадаар хөнөөсөн энэ хэргийн үйлдэгч нь Сейфиддин Регзү хэмээх 23 настай оюутан залуу ажээ.
Белги, Герман, Тунис улсын 38 иргэн түүний суманд өртсөн боловч алан хядагчийн гол бай нь Франц болон Англи улсын иргэд байсан байна.
Тэрбээр өмнөх өдөр нь тус газраар судалгаа хийж явсан нь ажиглалтын камерт үлдсэн бөгөөд аллага үйлдэхээс арваад минутын өмнө тэнд байсан жуулчидтай элдвийг хошигнон, зарим хүмүүсийг “эндээс явсан чинь дээр дээ” хэмээн ярьж байсан гэж шархадсан хүмүүс мэдүүлжээ. Эндээс үзэхэд Сейфиддин хохирогчдоо урьдчилан судалж байсан гэж харагдаж байна.
Түүний хохирогч болох 60 настай нэгэн хатагтай бууны суманд өртсөн боловч сум нүдний шилийг нь онон амь аврагджээ.
Тунис улсын засгийн газраас эгэл нэгэн оюутан залуу ийм хэрцгий аллага үйлдсэнд ихээхэн харамсаж буй бөгөөд ядуухан амьдралтай тэрбээр “Залуу Исламчууд” хэмээх бүлгийн идэвхитэй гишүүн байсан гэдгийг мэдэгдлээ. Каннабист ихээр донтсон Сейфиддиний гэрт очиход хоол гэхээр зүйл үгүй тун ядмагхан орчин угтжээ.
Түүний авга ахын хэлснээр бол даруухан эелдэг зантай дүүгээ ийм хэрэг хийсэнд үнэхээр итгэж чадахгүй байгаа бөгөөд өмнөх өдөр нь түүнтэй уулзахад амьдрал ахуй нь хэвийн байгаа тухай ярьж байсан гэнэ. Алан хядагчийг хоёрхон сумаар хөнөөсөн цагдаагийн ажилтан өдгөө “баатар” хэмээн мандаж байна.
И.Мөнхцэнгэл
