Багануурчууд өнгөрсөн ням гаригт хотын анхны захирагчаа сонголоо. Эрчим хүчний хэмээн олноо танигдсан Н.Тавинбэх 57.72 хувийн саналаар үнэмлэхүй ялалт байгуулсан юм. Зарим цахим хуудсаар Багануурын сонгууль дахих магадлалтай гэсэн мэдээлэл гараад буй. Тэгвэл хууль, эрх зүйн үүднээс авч үзбэл дахих ямар ч боломжгүй юм байна. Учир нь Багануурын сонгууль Хот тосгоны захирагчийн сонгууль явуулах огцруулах тухай 1994 онд баталсан журмаар зохицуулдаг ажээ. Энэ журмын 24 дэхь хэсэгт "Хот тосгоны захирагчийн сонгуульд оролцсон нийт сонгогчийн олонхийн санал авсан нэр дэвшигчийг захирагчаар сонгосонд тооцно" гэсэн заалт бий.  Нэр дэвшигчдийн хэн ч олонхийн санал аваагүй тохиолдолд дахин сонгууль явуулна гэдгийг энэ дүрэм, журамд тодорхой зааж өгсөн байгаа юм. Тэгвэл Багануурын сонгуульд бүртгэлтэй сонгогчдын 45.3 хувь нь оролцсон байна.  Сонгуулийн нэгдсэн хороон дээр санал хураалтын дүнг нэгтгэхэд Н.Тавинбэх 57.72, Ш.Отгонбаяр 28.88 хувь, Р.Ганбаатар 9.79, Ц.Цогтбаяр 2.79 хувийн санал авсан байна. Н.Тавинбат нь ШУТИС-ийн цахилгааны инженерийн ангийг дүүргэсэн. 2008-2012 онд ИТХ-д МАН-аас Багануурын иргэдийн төлөөлөн сууж байжээ. Тэрбээр "Багануур энерги" компанийн захирал, 2013 онд Зүүн өмнөд бүсийн цахилгаан түгээх сүлжээ компанийн даргын албан тушаалыг хашиж байсан. Энэ компанийг амжилттайгаар удирдаж, Монросцветментийн 1.4 тэрбум төгрөгийн өрийг барагдуулсан байдаг. Тэрбээр "Багануур брендийг бүтээцгээе" уриатай мөрийн хөтөлбөрөөр сонгуульд оролцсон юм. Нутгийн зон олноо ажилтай, орлоготой байлгах нь түүний мөрийн хөтөлбөрийн цөм гэж ойлгож болно.

С.Пуужин