Өнгөрсөн долоо хоногийн Лхагва гариг буюу 5 сарын 25-нд Сингапур улсад эхэлж 7 хоног үргэлжилсэн Ази, Номхон далайн бүс нутгийн улс орнууд оролцсон Үл хөдлөх хөрөнгийн Хөрөнгө оруулалтын чуулга уулзалтанд Монгол улсаа төлөөлөн үл хөдлөх хөрөнгө зуучлалын RE/MAX Монголиа компанийнхан болон Барилга хот байгуулалтын яамны төлөөлөгчид амжилттай оролцоод ганзага дүүрэн ирсэн сайхан мэдээг та бүхэндээ дуулгая.
Энэхүү арга хэмжээнд оролцсоноор Азийн зах зээлд жишиг улс болон хөгжиж буй Сингапурын үл хөдлөх хөрөнгийн зах зээлийн хөгжил, бодлого, туршлагаас суралцах, үл хөдлөх хөрөнгийн үнэ цэнийг хэрхэн нэмэгдүүлэх, хөрөнгө оруулагч нарыг хэрхэн татаж олон улсын зах зээлд амжилттай оролцох талаар дэлхийн түвшний үл хөдлөх хөрөнгийн мэргэжлийн шинжээчдээс иж бүрэн сургалт авах, томоохон хөрөнгө оруулагч нарт Монголын төслүүдээ танилцуулах зорилготойгоор оролцсон бөгөөд мөн Сингапурын Засгийн Газрын дэргэдэх Сингапурын Үл хөдлөх хөрөнгийн агентлаг, хөгжлийн бодлогыг хэрэгжүүлэгч мэргэжлийн байгууллагуудтай уулзсанаар тун ажил хэрэгч, өндөр үр өгөөжтэй арга хэмжээ болжээ.
Монгол улсаа төлөөлөн БХБЯ-ны Үл хөдлөх хөрөнгийн зах зээл, гадаадын хөрөнгө оруулалтын хэлтсийн дарга Ж.Бурмаа, Үл хөдлөх хөрөнгийн зах зээл, гадаадын хөрөнгө оруулалтын хэлтсийн ахлах мэргэжилтэн Ю.Доржпагма нар “МОНГОЛЫН ҮЛ ХӨДЛӨХ ХӨРӨНГИЙН ЗАХ ЗЭЭЛ, БАРИЛГЫН САЛБАРЫН ХӨГЖИЛ БОЛОН ХӨРӨНГӨ ОРУУЛАЛТЫН ОРЧИН” сэдвээр илтгэл тавьсан нь Монголынхоо үл хөдлөх хөрөнгийн салбарыг олон улсад сурталчлан таниулахад нэгэн том алхам болж чадсан байна. Дээрхи сургалтанд хамрагдсанаар төлөөлөгчид маань, олон улсын хөрөнгө оруулалтын зах зээлд оролцох эрх бүхий сертификаттай болсон байна.
Чуулга уулзалтын дараагийн арга хэмжээгээр 5 сарын 28-ны Бямба гаригт, Үл хөдлөх хөрөнгийн хөрөнгө оруулалтын томоохон үзэсгэлэн болж өнгөрлөө. Энэхүү үзэсгэлэнд Монгол улсын төлөөлөгчид Монголын шилдэг 20 гаруй төслүүдийг Ази Номхон далайн бүс нутгийн томоохон хөрөнгө оруулагчдад танилцуулж, оролцогч бусад улсуудын төслүүдийг сонирхож, мэдээллээ солилцлоо.
Энэхүү арга хэмжээнд Бүгд Найрамдах Сингапур улс дахь Онц бөгөөд бүрэн эрхт элчин сайд Төмөр Лхагвадорж хүрэлцэн ирж Монгол яагаад хөрөнгө оруулалт хийх хэрэгтэй вэ гэдэг талаар илтгэл тавьсан нь хөрөнгө оруулагч нарт Монголоо сурталчилсан сайхан үйл ажиллагаа болсон юм.
Хөрөнгө оруулалтын чиглэлээр дэлхийн 15 оронд Үл хөдлөх хөрөнгийн мега төслүүдийг удирдан маш амжилттай ажиллаж байсан, Сингапурын үндэсний их сургуулийн профессор, ерөнхий сайдын дэргэдэх үл хөдлөх хөрөнгийн шинжээчдийн багийн зөвлөхүүдийн нэг, энэхүү зах зээлд 34 жилийн туршлагатай Хэрролд Танг хөрөнгө оруулагч нарын шийдвэрт нөлөөлдөг гол хүчин зүйлс зүйлс бол тухайн төслийн хөрөнгө оруулалтын эрсдэл, оруулсан хөрөнгө оруулалтаа эргэн олох хугацаа, санхүүгийн систем, тайлангийн нээлттэй байдал, мэргэжлийн боловсон хүчин, тогтвортой байдал байдаг. Сингапурын хөрөнгө оруулалтын зах зээлийн нийт 70% ийг ТОП 10 компани эзэлж байгаа бөгөөд үүнээс топ 5 компани буюу Сингапур лэнд, Симатек, Кеппел ланд зэрэг 5 компани нийт зах зээлийнхээ 50% ийг эзэлж байгаа юм.
Дээрхи бүх компаниудын төлөөлөгчид хөрөнгө оруулалтын чуулга уулзалтанд хүрэлцэн ирж бүхий л боломжуудын талаар манай төлөөлөгчидтэй нээлттэй ярилцсан нь дараагийн хөгжилд хөтлөх гүүр болж чадлаа гэж оролцогчид харж байгаа юм. Тэд үйлчилгээний апартментууд, зочид буудал болон олон зүйлсийг нэг дор нэгтгэсэн комплекс төслүүдэд илүү анхаарал хандуулж байгаа нь анзаарагдаж байлаа.
Ийнхүү үл хөдлөх хөрөнгийн зах зээлд олон шинэлэг зүйлсийг нэвтрүүлж, барилгын салбарын хямралтай үеийг болож болгон ашиглаж буй РеМакс Монголиагийн хамт олон олон улсын үл хөдлөх хөрөнгийн зах зээлийг Монголын зах зээлтэйгээ холбох томоохон зорилгоо биелүүлсээр явна.
