Улс төрд хүчээ сорихоор зэхсэн биш “Урлагийн хүн байж тайзан дээрээ л байж байхгүй. Юугаа хийж улс төр рүү зүтгээд байгаа юм” гэх ба “Урлагийн уран сайханч янаг хүүхэн” зэрэг элдэв нэр хоч зүүж буй дуучин М.Нарантуяаг ихэнх хүмүүс Нара нэрээр нь сайн мэддэг. Арлын оронд урлагийн чиглэлээр суралцаж, хажуугаар нь гоо сайхны курс төгсч, басхүү шөнийн клубт зөөгч хийж явсан гэх дуучин бүсгүй маань олны хэл амнаас залхсан уу, яасан. Энэхүү зургаа дэлгэж, төгсөлтийн баярынхаа содон агшныг хуваалцлаа.
Тэрбээр энэ талаараа “Боловсролын тухай боловсролтой байрын бүсгүй өөрийн сэтгэгдлээ оруулжээ. Хэлэх гэсэн санаа нь хүндлүүштэй ч тэр сэтгэгдэл, нийтлэл доторх урлагийн боловсролыг боловсролд тооцохгүй, биеийн тамир спорт ч бас боловсрол биш гэсэн хандлага нь энэхүү сэтгэгдэл бичихэд хүргэлээ...
Их дээд сургуулиар олгогддог мэргэжил, боловсролын дээд нь эрх зүйч, эдийн засагч, гадаад харилцааны мэргэжилтэн гэж ойлгох нь өрөөсгөл юм. Мэргэжил бүхэн сайхан. Улс орны асуудал хэлэлцэхэд дуучин миний ухаан дутна гэж дүгнэжээ... Дуу дуулдаг учраас ухаан муутай байна гэсэн үг биш л дээ... Улсын их хурлын гишүүн бол иргэдийн төлөөлөл тэднийг сонсож, мэдэрч, асуудлыг нь ойлгож чаддаг, амьдралын сайн сайхны төлөө хамтдаа зүтгэж чаддаг хүн байх ёстой юм. Харин нарийн мэргэжлийн салбарт мэргэжлийн хүмүүс ажилладаг, тэдний зөвлөгөө дэмжлэгийг авдаг, хамтдаа хэтийг хардаг, асуудлыг шийддэг байх ёстой.
Намайг уншаагүй, болоогүй, боловсроогүй гэдэг шүүмжлэлийг би хүлээн авна. Хүн насан туршдаа боловсроно. Харин улс орныг зөвхөн боловсролоор удирдана түүн дотор урлагийн боловсролыг тооцохгүй гэсэн хандлагыг би хүлээн авахгүй эрс эсэргүүцнэ. Урлагийн салбарт сурч дуучны мэргэжил эзэмшлээ гээд бусдад өөлөгдөх утгагүй. Биднийг эзэмшсэн мэргэжлээр минь битгий гоочлоорой... Их эрдэмтэн Чой.Лувсанжав багш "Хүн болоогүй хүнд боловсрол олгоно гэдэг босоо ороолонд алтан шүд хийж өгөхтэй адил" гэж хэлсэн байдаг. Энэ үгийг өглөө бүр санахад ч илүүдэхгүй мэт” хэмээн сэтгэгдлээ илэрхийлж, өөлж гоочилсон зарим нэгэн хариу барьжээ.
С.Цахиур
