АНУ-ын цэргийн бааз байрладаг Японы Окинава аралд хэдэн мянган хүн оролцсон эсэргүүцлийн жагсаал боллоо. Тэдний ийнхүү жагсах болсон зорилго нь тус бүс дэх Америк цэргүүдийг нэн даруй буцаан гаргахыг шаардахад чиглэж буй юм. Энэ бүх жагсаал цуглаан АНУ-ын Тэнгисийн цэргийн албан хаагч 20 настай япон эмэгтэйг хүчирхийлж, улмаар амь насыг нь бүрлэгэсэн хэрэгтэй холбоотой гэж СиЭнЭн агентлаг дамжууллаа. Окинава аралд АНУ-ын Тэнгисийн цэргийн 26 мянган албан хаагч бүхий цэргийн бааз байдаг бөгөөд орон нутгийн иргэд удаа дараа тус баазыг буцаан татахыг шаардсан ч өнөөдрийг хүртэл дорвитой шийдэлд хүрч чадаагүй байгаа юм.

Жагсаалд оролцогчид аллагын хэргийн хохирогч Рина Шимабукурод хүндэтгэл үзүүлж, нэг минут чимээгүй зогссон байна. Энэ үеэр хохирогчийн аав олон нийтэд хандан үг хэлэхдээ "Яагаад заавал миний охин аймшигт хэргийн хохирогч болов? Гадны цэргийн ангийн албан хаагчдын танхайрал хэрээс хэтэрсэн нь үнэн бөгөөд над шиг ижил зовлонтой япон хүн олон бий. Ийм зовлон амсах хүний тоо дахиад битгий нэмэгдээсэй" гэв.

Окинавад өчигдөр болсон жагсаалтай ижил үйл ажиллагаа Токио хот дахь Японы парламентийн байрны гадна ч бас болсон талаар Киодо мэдээллийн агентлаг дамжууллаа.

С.Дамдин