Энэ мэдээ хуучирсан буюу 2019/03/12-нд нийтлэгдсэн мэдээ болно.

Гэр хорооллыг дэд бүтцэд холбох эхний ээлжийн төсөлтэй танилцлаа

Нийслэлийн МАН-ын дарга Д.Сумъяабазар, Барилга хот байгуулалтын дэд сайд Б.Мөнхбаатар, Нийслэлийн Засаг дарга бөгөөд Улаанбаатар хотын захирагч С.Амарсайхан, НИТХ-ын дарга Р.Дагва тэргүүтэй хүмүүс өнөөдөр “Дэд бүтцийн төв” төслийн хамгийн эхний загвар төсөлтэй очиж танилцлаа. Энэхүү төслийг Чингэлтэй дүүргийн 7 дугаар хорооны нутаг дэвсгэрийн 220 нэгж талбарыг хамарсан 14 га газарт хэрэгжүүлж байна.

Төслийн хүрээнд 220 нэгж талбарын 285 айлын өрхийг инженерийн шугам сүлжээнд холбохоор төлөвлөн, эхний ээлжийн 33 айлыг дулаанд холбожээ. Нийслэлийн МАН-ын дарга Д.Сумъяабазар хэрэгжиж буй төслийн ажлыг сайшаагаад, цаашид ажлаа шуурхайлан, төлөвлөсөн ажлаа хугацаанд нь хэрэгжүүлэхийг захилаа.

Чингэлтэй дүүргийн 7 дугаар хороонд хэрэгжиж буй “Дэд бүтцийн төв” төсөлд хамрагдсан 285 айл өрхөөс 28 айл өрх шинээр амины орон сууц барьж, 104 айлын байшин сууцыг дулаалгын аянд хамруулсан байна.  Мөн тус хорооны нутаг дэвсгэрийн 220 нэгж талбарыг хамарсан 14 га газарт жишиг гудамж, авто болон явган зам, ногоон байгууламж, хиймэл нуур, гэрэлтүүлэг, камержуулалт иж бүрэн хийгдэж, 2019 оны 05 дугаар сард хүлээлгэн өгөхөөр ажиллаж буй аж.

“Дэд бүтцийн төв” төсөл хэрэгжсэнээр агаар, хөрс, орчны бохирдол бүрэн үгүй болж, иргэд өөрийн өмчлөлийн газартаа амины орон сууц барьж, газрын үнэлгээ 3-4 дахин нэмэгдэн, эрүүл, аюулгүй, тав тухтай амьдрах нөхцөлөөр хангагдах юм.

УИХ-аар батлагдсан “Улаанбаатар хотыг хөгжүүлэх 2020 оны ерөнхий төлөвлөгөө, 2030 оны хөгжлийн чиг хандлагын баримт бичиг”-т нийцүүлэн нийслэл хотын гэр хорооллыг 3 бүсчилж хувааж хөгжүүлэхээр “Нийслэлийн орон сууц, дэд бүтцийг хөгжүүлэх” дэд хөтөлбөрийг НИТХ-ийн 2018 оны 02 дугаар сарын 27-ний өдрийн 14/01 тогтоолоор баталсан.

Төвлөрсөн шугам сүлжээнд холбоход техникийн шийдлийн хувьд боломжгүй, хэсэгчилсэн шугам сүлжээгээр хангах боломжтой 2,794 га бүхий гэр хорооллын дундын бүсэд 2017-2020 онд нийт 50 ширхэг хэсэгчилсэн болон бие даасан инженерийн хангамжийг нэвтрүүлэх Дэд бүтцийн төвийг барьж байгуулах юм. Ингэснээр 17,500 нэгж талбарын 22,250 айл өрхийг инженерийн шугам сүлжээнд холбоно. “Дэд бүтцийн төв” төсөл хэрэгжсэнээр иргэд өөрсдийн газартаа инженерийн болон нийгмийн дэд бүтцээр хангагдсан, тав тухтай, тохилог  амьдрах нөхцөлийг бүрдүүлэх юм.

Шуурхай.мн 

Д.БАТЗОРИГ: ТҮРЭЭСИЙН ЗОРИУЛАЛТААР 1562 АЙЛЫН ОРОН СУУЦ БАРИГДАЖ БАЙНА
Д.БАТЗОРИГ: ТҮРЭЭСИЙН ЗОРИУЛАЛТААР 1562 АЙЛЫН ОРОН СУУЦ БАРИГДАЖ БАЙНА
 
“Иргэдээс урьдчилгаа авсан ч барилгаа ашиглалтад оруулдаггүй компаниудад хяналт тавина“
“Иргэдээс урьдчилгаа авсан ч барилгаа ашиглалтад оруулдаггүй компаниудад хяналт тавина“
Энэ мэдээ хуучирсан буюу 2019/03/12-нд нийтлэгдсэн мэдээ болно.